【PCM】相信大家屋企都堆滿咗一大堆買唔同 Gadget 附送的 USB-C 線，再加上自移購買的所謂 「快充」USB 線，外表望落雖然一模一樣，但其實「內功」可以相差好遠！好多人唔明，同是 USB-C 線，有啲線支援高達 40Gbps 速度、240W 供電兼行到 8K 螢幕；但有啲「跟機線」原來只係得慢速 480Mbps 傳輸。以前要分清邊條打邊條，可能要買粒「USB 電壓電流測試吉仔」，但今日介紹呢款 Mac 免費實用小工具 WhatCable，就可以幫你將部 Mac 變身成線材測試儀！
幫 USB-C 線驗明正身
好多人以為 USB-C 線求其插到、充到電就無問題，但當你想駁 4K 螢幕、或者用落 MacBook 進行大檔案傳輸時，先發現畫面閃爍或者行得極慢。
這全因為每條 USB-C 線內置的晶片及架構不同：
傳輸速度：由舊式 480Mbps、10Gbps、到最新 USB4 的 40Gbps 不等。
供電極限：舊款線可能只支援 60W（3A），新款高規格則可達 240W（5A）。
影像輸出：是否支援 DisplayPort 信號，足夠輸出 4K 甚至 8K 畫面。
其實 Mac 本身系統內部已經有讀取 USB 晶片資料嘅功能，只不過沒有顯示俾用家睇。而 WhatCable 的出現，就是將這些晶片標籤（如 Vendor ID、USB-IF 認證）化為資訊，一眼望晒！
WhatCable 兩種測試玩法教學
WhatCable（下載網址：whatcable.uk）的使用方式非常直覺，主要有兩種測法：
玩法 1：自給自足「貪食蛇」測試法
如果手頭上冇駁住其他火牛或裝置，你可以直接將 USB-C 線的其中一端插落 Mac 嘅 Port A，另一端插落同一部 Mac 嘅 Port B。
運作原理：雖然呢個做法望落似「永動機」，但 WhatCable 可以透過兩組連接埠的互相溝通，即時解碼出該條線材內置晶片的資訊。
一睇即知：畫面會直接顯示該線材是否獲得 USB-IF 的官方認證、最高傳輸頻寬以及最高支援的電流功率。
▲筆者以市售的 「快充線」兩個 USB-C 插入 MacBook Pro 的兩個 USB-C 插頭，形成一個貫通環境，就可以在沒有其他裝置的情況下測試 USB-C 線材。
▲執行 WhatCable，可以睇到插線的插頭設計有點鬆，有機會造成接觸不良。而線材有 e-maker 晶片但無廠商資料，可以認到支援 240W 充電，但數據只有 480Mbps 的 USB 2.0 速度。
玩法 2：實時工作極限測試法
當你用 USB-C 線駁住 Mac 同埋其他外置裝置（例如：PD 充電器、外置 SSD 或是 4K 顯示器）時，打開 WhatCable：
抓出「效能瓶頸」：App 會判定目前係邊一個硬件限制咗速度。例如會寫明「因為外置硬碟只支援 USB 3.0，所以速度卡在 5Gbps」，或者是「因線材不支援，導致 96W 火牛只能輸出 60W」。
螢幕實測：駁顯示器時，會顯示目前的解像度及更新率（Refresh Rate）是否已開足馬力。
▲以同一條線材，一連接 USB PD 火牛，一邊連接 MacBook Pro，由於 MacBook Pro 已充滿 80% 電量，所以充電暫停。另線材最多支持 20V@1.5A 即 30W 充電。使用時可以知道是否正使用快充功能。
▲筆者改用 Apple Studio Display 顯示器 (2025 版本) 配合原裝 ThunderBold 線材，得出支援 ThunderBolt / USB 4 結果，同時認到線材是 Apple 原裝 1.8M Thunderbolt 線材，最高可以用到 40Gbps 傳輸數據，以及。94W 充電，足以支持 MacBook Pro M5 Pro。
▲再查看細節，剛可以睇到 Studio Display 的 USB Hub 連接裝置的狀態。包括有 USB 3.0 Hub、USB 10Gbps 外置 SSD，以及一個 USB 2.0 裝置（滑鼠）。
▲使用 ThunderBolt /USB 4 接線連接 iPhone 15 Pro Max 的狀況，可提供 10Gbps 數據傳送。
▲改用 Apple 原裝跟機的 USB-C 線，沒有 e-maker 資科， 但可以提供最基本的 USB 2.0 速度。
免費版 vs Pro 版
目前 WhatCable 提供免費下載，基本功能已經完全足夠普通用家將 USB 線分門別類，揀出邊條係垃圾慢線、邊條要留低自用。
如果你是科技發燒友，WhatCable 亦提供一次性收費 £9.99 (港幣約 $100 左右) 的「Pro 版本」，升級後可以睇到每秒鐘兩邊裝置在進行 Power Delivery（PD）協議握手時的電壓、電流實時跳動數據，方便用來除錯。
有了 WhatCable，以後一執到不知名 USB-C 線，只要插落 Mac 幾秒鐘，就能分清邊條係「好嘢」、邊條係「龜速充電線」，從此唔洗再估估下！雖然部分劣質山寨線材可能會有晶片欺騙（Lie）的情況，但此 App 對於市面上九成知名品牌的線材都有極高的準確度，絕對值得 Mac 用家珍藏。
