0
0
費托女球迷飛逾萬公里 圓16年美夢

費托女球迷飛逾萬公里 圓16年美夢

這正是Kee眼中最珍而重之的物件,連偶像ig都用上的照片。 (受訪者提供)

【Now Sports】「一張合照、一個簽名,背後極具意義,記載住我嘅青春。好夢幻嘅一日,無憾了。」一份延續16年的熱愛,促使女球迷Kee不惜飛越10,000公里,遠赴西班牙追夢。最終如願與偶像近距離接觸,為這段追夢旅程,留下最動人的深情記憶。

「2010年世界盃嗰陣,身邊同學都熱烈討論,我就喺嗰個時開始接觸足球。當時西班牙係大熱,我就留意吓新聞,想同大家有話題傾吓。一開頭咩都唔識,好膚淺咁純粹因為佢俊俏嘅外表,而留意佢。」Kee當年為了與同學有共同語言,開始關注足球,那時候是狂牛首個盛世,球星如雲,她偏偏對一位球技與樣貌都出眾的星將情有獨鍾……

說的是費蘭度托利斯,一個當時已一再成為利物浦賽季首席射手,並於2008年歐洲國家盃決賽對德國一腳定江山,成為狂牛捧盃英雄的超級射手。

「但之後睇多咗佢以前嘅事蹟同比賽片段,就好欣賞佢嘅實力,同埋球場上嗰份魅力,佢既係歐洲國家盃功臣,又係利記傳奇,甚至私底下對屋企人、老婆仔女都好sweet。嗰時成隊西班牙我都好鍾意,特別係佢同韋拿嘅『雙箭頭』,我同我BFF一人鍾意一個,一齊睇波,試過凌晨3、4點打電話叫醒對方起身一齊支持愛隊,真係好青春。」

「到後來,見證西班牙隊創紀錄連續拎到兩個歐國盃同一次世界盃冠軍,就徹底地沉船了。」

既已入坑,她這些年自然儲存無數與托利斯有關的珍藏物品:「細個讀書無乜錢,買唔起好多嘢,但嗰時基本上見到關於西班牙,或者托利斯嘅新聞、雜誌、海報,我都會買嚟儲起佢。屋企人見放到好殘舊嘅,都叫過我丟咗佢,但我到依家都仲好好咁珍藏喺個箱入面,全部都係回憶殺!我第一件波衫,其實係上網買嘅二手西班牙9號波衫,之後朋友都有送佢嘅波衫畀我做生日禮物。到後期,做part-time有少少收入,就自己買咗第一件西班牙波衫。」

「中間好有幸去咗西班牙做exchange,撞正佢回歸馬體會,有幸去睇咗兩場西甲打吡戰,雖然門票太貴只能坐山頂位。到佢喺馬體會踢告別戰,我都買咗件印咗日期嘅波衫,而呢件波衫啱啱亦都成功拎到佢親筆簽名!之後我仲親身飛去日本鳥棲睇佢職業生涯告別戰,買咗波衫同一本寫滿日文嘅自傳,雖然完全睇唔明,但都好想收藏。」

Kee只恨自己太遲入坑:「錯過佢喺利物浦最鋒芒畢露嘅時代,好彩前年佢同謝拉特一齊踢咗場元老賽,仲要有入球,賽後,我都買咗嗰件波衫當彌補一下小小嘅遺憾。」

眾多珍藏物件,她說最難忘是一張單反照片:「一定係2019年,佢跟鳥棲砂岩嚟香港大球場踢賀歲盃,我用單反影咗一張佢嘅相放上網,過咗兩日,竟然喺佢官方IG見到同一張相!我對比咗好耐,好肯定嗰張就係我影嘅。自己偶像嘅IG account竟然有留意到我影嘅相,真係好開心好滿足!今次我亦特登印咗嗰張相出嚟畀佢簽名,對費托可能只係小事一樁,未必會記得,但對我嚟講,真係別具意義。」

為了圓夢,Kee真箇歷盡風吹雨打,過程轉折,且有一份失而復得的感覺。「一早起身搭火車去馬德里,再轉咗幾程火車、地鐵同巴士,先去到比較偏遠嘅馬德里體育會B隊嘅球場。企喺教練席身後,落住微雨、吹住風睇咗成場波,雖然有啲凍,但能夠咁近距離望住費托以另一個身份好認真咁執教,感覺真係好不可思議,好興奮!最後球隊亦都贏波。」

「完場後,我原本喺其中一個Gate等佢,點知有兩個小粉絲用西班牙文話佢架車好似唔喺度,我就跟咗佢哋去另一邊閘口等。點知等咗9個字,見到好多球員都揸車走晒都唔見佢,連保安都話佢應該喺另一邊走咗。我本來以為要失望而回,行返轉頭經過原本個閘口時,見到仲有幾個人喺度,行過去問佢哋,先知原來費托仲喺上面!」

皇天不負有心人,Kee與偶像近距離接觸的時刻,終於來臨。「過咗5至10分鐘,本尊真係出現,我成個人震晒,手上啲嘢攞到七零八落,戰戰兢兢咁用西班牙文問佢,可唔可以簽名同合照,佢勁nice一一答應。臨走前,我仲問佢夜晚會唔會去睇西班牙國家隊比賽,同埋同佢講再見,佢都有好親切咁回覆我。成件事失而復得、夢想成真,真係好開心!」

「夜晚我都買咗票入場睇歐國聯西班牙對英格蘭,都係我第一次親身支持西班牙國家隊,開場前目睹佢同卡斯拿斯捧住世界盃交接比施蒙,好似見證一個黃金年代嘅傳承。」

回想這次行程,Kee表示籌備多時:「最近打算報讀一個西班牙文短期課程,同時都想把握機會近距離去見佢,因為知道佢教緊馬體會B隊,所以我特登揀返西班牙中部嘅學校。出發前研究好邊幾日有主場比賽,亦上網請教之前去過嘅師兄拎經驗,特登印咗一啲相,同埋手寫咗張應援牌,希望可以吸引到佢注意、大機會啲影到相。」

「當然如果講到最長遠嘅準備,其實由我當年開始學西班牙文嗰一刻起,就已經好希望有一日可以用西班牙文同佢講幾句。雖然今次見面都係西英夾雜,但總算圓滿咗多年嘅夢想。」

夙願得償,Kee心情久久不能平伏,大讚偶像的親和力:「真係好感動、好唔真實,成個人震晒,好開心甚至有啲眼濕濕。佢真人真係好 nice、好靚仔、好 charm,一個偶像嘅內在修養,同埋對fans嘅態度真係好重要,佢真係好似之前去過嘅師兄講咁,非常友善、好好人,成個王子一樣。」

Kee坦示能夠成功圓滿,需要感激的人多得很:「首先好多謝費托帶咗咁多美好回憶畀我,仲咁親切咁同我簽名合照。另外好想多謝頭先提到我讀書時期嘅BFF,陪我一齊走過青春、一齊儲起呢段回憶,今次我去之前好緊張,佢都一路鼓勵我,圓夢後我亦第一時間同佢分享。」

「同時亦好多謝我屋企人同男朋友,由細到大都無話過我去追星,喺能力範圍內都會支持我,甚至為我圓夢而開心。最後,亦想多謝自己有堅持去追夢,其實一個女仔喺歐洲有時都會有啲擔心、成日要提高警覺,而且我入坑嗰時,費托因為傷患開始下滑,成日都聽到好多唔好聽嘅聲音,話佢笑佢球技大不如前,但我一直都守住初心,喺心入面默默支持佢,雖然依家已經退役,都算圓夢!無憾了。」

  1. 更多