【Now Sports】馬德里打吡大戰在即，皇家馬德里香港球迷會會長June認為，在摩連奴領軍下，皇馬仍在整合，不過他暫時能夠駕馭眾星。
受訪者：June（皇家馬德里香港球迷會會長）
問：今季由摩連奴領軍，可否初步評論其領軍表現？
June：球隊依然整合中，見到摩daddy著名嘅反防陣式出現。而佢面對各大球星，明顯暫時搞得掂。見到雲尼素斯同安巴比回防同迫搶多咗，但防守都仲要加強（每季都咁講）。而進攻方面，暫時都係似靠球員嘅個人能力入波；安巴比依然係入波嘅主要供應點；比寧咸活動區域大咗，比上季活躍番，古拿殊有限上場時間都交出1球兩助攻，希望佢今季係中場行軍嘅重要一員（球迷會好多女球迷嘅波衫都印咗佢，包括我）。雲尼就仲未上力，但見到摩連奴話對佢有信心，知道佢未返到最佳狀態，咁我哋就期待下 。
問：今季幾個新兵，暫時邊一個最對辦？
June：一定係艾斯比，最新嘅關鍵先生，後備出場可以改變到場波 。
問：今場打吡大戰，皇馬有何有利及不利因素？
June：不利因素係作客（笑，但認真嘅）。皇馬防守唔穩陣，但係馬體會防守就出名穩陣。而且佢哋每次對皇馬都好似係出盡所有力，隨時準備打交。有利因素就係我哋有摩連奴The Special one同一眾強勁嘅進攻球員，而且喺馬德里踢，唔使舟車勞頓，同埋2026年兩場對賽，我哋都贏，應該會增強球員取勝嘅信心 。
問：預計戰局點發展，比數如何？
June：預計馬體會都係防守，如果我哋都有加強防守，比數應該唔大，我估係皇馬贏1:0 。
問：球迷會今晚可會有睇波活動？
June：難得早場，球迷會今晚聯同都會大學，合作搞睇波活動 。
問：球迷會未來動向如何？
June：2027年，球迷會將會踏入10周年，而球會亦踏入125周年。我哋計劃緊一啲慶祝嘅活動、波衫展，邀請其他球迷會踢波，甚至乎聯合海外皇馬球迷會搞一啲活動。
西甲 馬德里體育會 對 皇家馬德里
Now TV 632台 20/09 22:15直播
