雙方互有攻守。
(©AFP)
【Now Sports】車路士雖然一度被白禮頓追成2:3較接近紀錄，但最終仍能主場以4:3贏波，開季兩連勝。
周日車路士主場對白禮頓的英超比賽，由阿士東維拉加盟數小時的門將馬天尼斯，已正選披甲把守最後一關，另一新兵摩根羅渣士繼續取得正選。
主隊一開波即有好開始，4分鐘車仔一次角球機會，拉菲亞把握門前混戰下快腳射入，領先1:0。一不離二，14分鐘一次快開界外球機會，由摩根羅渣士左路底線傳中，柏度尼圖小禁區篤入，車仔領先2:0。24分鐘柏度尼圖於右路傳中，祖奧柏度小禁區控定後射門，卻柱邊出界，浪費入球機會。32分鐘車仔一次快攻，由哈度由後場帶到禁區後傳中，祖奧柏度是次沒有浪費，攻入射成3:0。白禮頓在3分鐘後追回一球，先是哥斯度拿斯埋門被馬天尼斯撲出，及後有也古耶門前補中，追成較接近的1:3，返回更衣室。
下半場雙方互有攻守，先是白禮頓有迪亞高高美斯54和56分鐘埋門，未能轉化為入球；另一邊廂車路士亦有高爾彭馬兩度近門埋門亦不中目標。結果白禮頓等待至63分鐘有哥斯傳中省中祖奧柏度變成鳥龍球，再度追成2:3較接近紀錄。車路士68分鐘作出一輪調動後，74分鐘取得成效，高爾彭馬中路推順，在峨嵋月頂位置掃把腳射入，再度拉開至4:2。白禮頓補時階段有哥斯頭槌頂入，但為時已晚，車仔最終主場以4:3擊敗白禮頓。
