球迷會當然希望球隊喺雙線都有所突破。
(筆者提供)
【Now Sports】講到球迷會對AC米蘭新球季嘅展望，坦白講季前請阿摩廉執教，我哋米蘭球迷真係好擔心，畢竟阿摩廉之前喺曼聯嘅表現實在「令人難忘」。不過睇完兩輪聯賽後，大家嘅疑慮頓時變咗有點期待！
撰文：Patrick（香港AC米蘭球迷會）
阿摩廉一直堅持嘅 343 戰術佈局同體系，已經初見成效，整體進攻流暢度同逼搶效率都令人眼前一亮，非常期待佢今季帶領球隊擦出更多火花。除咗教練層面，管理層喺今個轉會窗嘅舉動，都大大提振咗士氣。紅鳥會長卡迪拿利（Gerry Cardinale）今次可謂「御駕親征」，親自揀選主教練，仲重金砸落去用咗 1.5 億歐元買新球員，當中包括購入干沙路拉莫斯呢位高質素前鋒，精準補強咗球隊最關鍵嘅中鋒位置。
睇到 Gerry 親自帶領新管理團隊，一同喺看台上睇波支持，球迷終於感受到老闆對新球季嘅重視同決心。
不過講到最令人頭痛嘅，肯定係隊內首席球星里奧嘅轉會問題。轉會窗就快關門，佢到底留定走，仲係一個未知數！佢想離隊都講咗成個暑假，如果走唔到的話，阿摩廉點樣塞佢入 343 體系發揮最大威力？
至於新球季嘅目標，球迷會當然希望球隊喺雙線都有所突破。歐霸盃方面，雖然我哋有過 7 次歐聯冠軍，但偏偏未拎過歐霸，所以好期盼球隊一路過關斬將，衝擊呢個隊史未曾解鎖嘅榮譽。至於意甲聯賽，目標前4、穩奪下季歐聯席位就係必須完成嘅基本底線。
最後仲有一個幾得意嘅現象，我哋球迷會發現最近多咗好多曼聯球迷頻繁關心米蘭嘅比賽同成績。睇嚟新球季英超、意甲球迷都多咗唔少共通話題，希望呢班曼聯球迷睇睇下意甲，有朝一日都可以考慮加入埋我哋香港AC米蘭球迷會，大家一齊睇波！
