洛迪今仗的表現亦重返自己應有的級數。
(©AFP)
【Now Sports】雙牙大戰，西班牙補時以1:0絕殺葡萄牙，晉級8強。雖則今仗狂牛未有統治比賽，但整體表現絕對收貨。
撰文：韓子熙（西班牙擁躉）
繼續需要讚的仍然是防守，不單數據上球隊仍維持清白之身，今仗防線整體都相當集中，面對里奧和柏度尼圖的突破，中場球員亦有幫助閘位球員協防，整場比賽葡萄牙的機會其實不多。
防守以外，今仗球隊的控制節奏的能力，明顯比起上仗對陣奧地利更好，雖則C朗的逼搶強度不高，但比賽初段整個中場基本形成 man to man，給予中場的壓力絕對不小，但球隊仍能透過奧耶沙巴的墮後與3中場形成overload解除逼搶，逼使葡萄牙回歸中位防守。洛迪今仗的表現亦重返自己應有的級數，巔峰的洛迪加上這條防線，贏得世盃指日可待。
有讚亦有彈，今仗前場的「把握力」仍然差勁，奧耶沙巴早段的單刀未中目標已經抵鬧，其後整條鋒線的表現都可以以差勁形容，多次中場球員underlap後地波傳中，整個禁區都未見西班牙球員前插，奧耶沙巴、巴安拿、奧姆都未有進攻對手禁區的觸覺。正如哥迪奧拿於曼城的team talk所講，「傳球後就要進攻球門。大家必須要入球！“When you pass the ball, attack the goal. You have to score the goals guys!”」創造機會，將皮球送到禁區的危險區域，但西班牙始終未能完成埋門一腳，所以有時tap-in都是一門學問。
晉身8強，下場對手將是比利時，雖然對手的中場有迪布尼、迪拿曼斯等世界級中場，但速率和運轉力上不如西班牙，個人認為今仗只要成功搶贏中場，比利時應是西班牙的囊中物。
撰文：韓子熙
子上談兵
【躉我講隊波】由列強擁躉在每場比賽後講愛隊。
