摩洛哥鋒將保迪今屆首戰一鳴驚人。
(©AFP)
【Now Sports】世界盃決賽周C組第2輪賽事，蘇格蘭對摩洛哥呢場賽事絕對左右小組出線形勢。蘇格蘭分組首戰1:0險勝小組世界排名最低的海地，摩洛哥就以1:1打和該組世界排名最高的巴西。
撰文：陳肇麒｜Now足球評述員
蘇格蘭鬥海地的比賽其實雙方各有攻守，最終憑藉麥堅的入球1:0小勝海地，這個效力阿士東維拉的中場亦以31歲238日，成為蘇格蘭歷史上世界盃最年長入球紀錄者。蘇格蘭喺小組比賽賽程可以話由弱到強。先對海地，今場將面對摩洛哥，最後一場鬥巴西，所以頭兩場絕對係佢哋能否晉級嘅關鍵之戰。
摩洛哥呢支非洲雄師，小組賽程就剛剛同蘇格蘭相反，由強到弱。首戰對住世界排名高自己1位的巴西，效力燕豪芬的摩洛哥前鋒沙巴利打開紀錄，巴西只憑著雲尼素斯個人能力追回一球，各得1分。第2場將對著蘇格蘭，最後一戰遇上海地。相信摩洛哥呢場對蘇格蘭必定以3分為目標，如果順利贏波攞住4分進入小組最後一場，對住海地相信晉級沒有難度。
摩洛哥對住巴西嗰場比賽，整體發揮甚至更勝巴西，全隊由前場逼搶到防守時嘅緊密聯防，發揮絕對對得住現在世界排名第7呢個位置，睇下呢支非洲冠軍，今年世界盃可以行得幾遠！
世界盃C組 蘇格蘭VS摩洛哥
Now TV 618台20/6 06:00直播
Now TV 616台4K直播
