般奴兩助攻超越碧咸 曼聯3：1維拉

【Now Sports】阿士東維拉周日雖然一度有巴克利的入球追成1:1平手，但曼聯最終仍憑般奴費蘭迪斯交出兩次助攻，在主場以3:1贏波。

周日主場對阿士東維拉的比賽，曼聯方面有阿麥迪亞路復任正選，錫斯高先任後備。比賽初段雙方中場拉踞一輪後，戰至21分鐘入肉埋門出現，曼聯開出角球，哈利麥佳亞頭槌二傳，阿麥迪亞路近門頭槌一批彈地波，馬天尼斯飛身撲出。曼聯其後控球時間較多，37分鐘，達洛治右路入楔禁區接應隊友長傳，一控抽射但一飛沖天。42分鐘，曼聯一次快攻，由般奴費蘭迪斯（Bruno Fernandes）禁區外遠射作結，但不中目標，雙方半場打成0:0平手。

下半場一開波由阿麥迪亞路右路抽射展開序幕，但一射炒高；51分鐘，曼聯一次反擊，由安保姆左路禁區抽射遠柱，馬天尼斯撲出底線，但隨即開出角球，卡斯美路接應般奴角球頂遠柱，笠死馬天尼斯，53分鐘曼聯領先1:0。維拉落後下隨即壓上前，59分鐘有明斯接應隊友罰球頭槌埋門，但柱邊出界。維拉換入艾巴咸和庇利後，入球出現，64分鐘一輪門前混戰，由今季首次正選的巴克利近門彎入遠柱得手，維拉追成1:1。

維拉前場一次交波失誤後，曼聯迎來反擊，由般奴斜傳交予入楔左路的古亞，順勢禁區射遠柱得手，曼聯71分鐘再度領先2:1，般奴費蘭迪斯亦以本季第16個助攻，超越碧咸單季做出15次助攻的紀錄。曼聯其後換入錫斯高，這名後備殺手再次交出表現，81錫鐘古亞左路出波，輾轉間錫斯高轉身抽射，省中明斯破網，曼聯拉開至3:1至完場。