曼治奠勝。
(©AFP)
【Now Sports】曼聯周日在英超頭場憑施亞斯及曼治建功,以2:1作客反勝水晶宮。
兩隊同於上一場比賽敗陣,主隊作出3個調動,包括以禾頓出任正選,而曼聯以曼治(Mason Mount)及達洛治分別取代馬沙拿維及杜古的正選位置。曼聯早段就有卡斯美路埋門逃不過倒戈門將甸軒達臣的十指關。水晶宮隨即還以顏色,射手馬迪達射中網側後,曾單刀射斜。
32分鐘,馬迪達在禁區內博得約賀犯規,親自操刀12碼,他首次射入被判無效,其後重再中鵠,水晶宮半場亦憑這入球領先。易邊後曼聯攻勢相對凌厲,憑兩個死球入波反勝。54分鐘,般奴費蘭迪斯開出自由球,施亞斯在禁區內心口控定後窄位抽入。
9分鐘後,般奴開罰球撥交予曼治,後者施射破網,曼聯反超前。曼聯於尾段換入久休的利辛度馬天尼斯,是他自2月(對手亦是水晶宮),事隔301日以來首次再戰英超。最終曼聯力保勝果到尾,賽後13戰得21分升上第6。水晶宮12場主場聯賽不敗走勢告一段落,賽後20分跌至第7。