紐卡素輕取森林。
(©AFP)
【Now Sports】紐卡素憑基馬尼斯和禾特馬迪下半場各入一球下，以2:0擊敗森林。
周日紐卡素主場對諾定咸森林的英超比賽，有艾蘭加正選上陣倒戈森林；另查比亞取代有傷在身的利華文圖，出任右閘。
紐卡素憑主場之利，初段取得優勢，10分鐘，查比亞右路搵到禁區內無人看管的祖亞寧頓，但後者第一時間掃射被沙斯救出。5分鐘後，祖亞寧頓接應博文角球二傳，近門一頂又被沙斯救出。19分鐘，森林一次禁區頂罰球機會，傑斯韋治主射彎過人牆，樸比雙手撲出。
中段紐卡素嘗試在左右兩邊出波，但受制於森林防守，但成效不大，結果臨完場前1分鐘，東拿利地波遠射不中目標後，雙方半場打成0:0平手。
下半場初段繼續由紐卡素做主導，52分鐘，禾特馬迪把握森林後防失誤近射，被守衛擋出，不過戰至58分鐘，入球出現，基馬尼斯搶走傑斯韋治腳下球，隨後上前接應丹般傳球施展遠程炮，收死沙斯令紐卡素領先1:0。
森林落後下換入幾名進攻球員，但未見成效，73分鐘，禾特馬迪近距離抽射射中門楣彈出，紐卡素差點再拉開比分；80分鐘，哈菲班尼斯的近射，又被沙斯出迎用身擋出。2分鐘後，基馬尼斯禁區內被艾利亞治安達臣侵犯，球證直指12碼，84分鐘禾特馬迪主射中鵠，結果紐卡素主場贏2:0。
