韋斯咸大勝而回。
(©AFP)
【Now Sports】韋斯咸憑下半場尾段連番入球，作客以3:0擊敗森林，取得本季首場英超勝仗。
周日諾定咸森林主場韋斯咸，雖然韋斯咸頭兩場英超比賽均輸波而回，但客隊初段反客為主。3分鐘富卻古6碼點接應獲特包斯傳中頭槌埋門，但皮球一頂過高；15分鐘再一次有富卻古施展頭槌，同樣不中目標。森林雖然主場出擊，但上半場埋門欠奉，只有18分鐘傑斯韋治左路近門頭槌被擋，算是較有睇頭。尾段具威脅埋門再次出現在韋斯咸身上，39分鐘柏基達中路左腳拉弓，沙斯僅僅救出，結果雙方半場打成0:0平手。
下半場森林一開波有基斯活頭槌被希亞文臣救出；那邊廂韋斯咸柏基達近門拉弓但出界。森林戰至中段終發揮主場本色，60分鐘開始傑斯韋治、基斯活、歷高威廉斯、艾利亞治安達臣及赫臣奧度爾連番施射，但一一被韋斯咸後防及門將希亞文臣瓦解。68分鐘有今夏轉投韋斯咸的卡林威爾遜禁區外施放冷箭，沙斯成功救出；此子81分鐘右路窄角度埋門，又再一次未能射破沙斯的十指關。
尾段韋斯咸換入森馬維成功比賽轉捩點，森馬維先是84分鐘交波予查洛保雲，後者禁區外左腳遠射破網，領先1:0；2分鐘後森馬維禁區內被桑加希侵犯，球證直指12碼，柏基達主射中鵠，88分鐘射成2:0；加上卡林威爾遜快攻接應迪奧夫傳送頭槌得手，補時階段拉開至3:0完場，助韋斯咸取得本季首場英超勝仗。
