【十三短打】激將法？沙比對Vini先貶後揚

【Now Sports】當沙比阿朗素公佈對奧維多正選名單，並冇雲尼素斯嘅時候，相信包括Vini自己在內，好多人都感意外。結果Vini後備上陣間接、直接建功，唔理沙比係想佢儲火，抑或真心變陣，總之用兵夠勇。

皇馬喺呢場西甲大勝3:0，安巴比起孖並唔意外，相信同樣多人談論係沙比阿朗素先收起雲尼素斯（Vinicius Junior）。Vini下半場中段落場後好爭氣，搶截對方個波助攻畀安巴比，而到補時仍勇猛，接應巴謙迪亞斯傳送喺禁區控定後「埋齋」，有火喎！敢斷言如果場波時間再長一啲，佢肯定仲有貨賣。

落場不過30分鐘左右，忽然間，大家好似見番最當勇嘅Vini。

即管聽沙比賽後點講。「Vini落場，參與兩個入球大局已定。決策以團隊為先，今日就係咁嘅情況。」沙比肯定Vini作用，到底佢係咪刻意刺激呢個巴西鋒將，唔知，只知佢用兵夠勇。其實除咗Vini，新加盟嘅名將阿歷山大阿奴同樣貶為後備。講到沙比用18歲嘅馬斯坦東奴踢正選，好成功，睇個小將好扭得擅爆破，當Vini喺後備席見到後輩咁威猛，唔恨得牙癢癢，落場時唔施展渾身解數至奇。

皇馬去季俾巴塞隆拿食住，係需要變局，要變就是大膽果敢，沙比就用行動話畀大家聽，雖然佢都係初領軍（唔計佢球員時代都踢過皇馬），但敢作敢為，確係有佢嘅一套，不落俗套。睇賽序，皇馬到下月底鬥馬德里體育會至迎來硬仗，好期待場打吡快啲嚟。

撰文：球十三

足球迷叫第十二人，冇偏愛，冷眼旁觀係十三。