祖奧菲力斯上季在AC米蘭表現仍然乏善足陳。
(©AFP)
【Now Sports】尋尋覓覓，離開母會賓菲加多年嘅祖奧菲力斯，仲未搵到適合嘅球會，甚至係自己嘅最佳置。
原來祖奧菲力斯（Joao Felix）已經25歲，而佢以1.23億歐元加盟馬體會，都已經係2019年嘅事。當年嘅天價令世界球迷都對佢寄予厚望，但嚟到2025年，踢過西意英聯賽之後，菲力斯都仲未搵到一支啱踢嘅球隊。
其實菲力斯喺馬體會嘅3季半期間都偶有佳作，但最後都係同教練施蒙尼鬧翻咗。之後無論係喺車路士、巴塞隆拿定係AC米蘭，表現都係平平無奇。車路士喺上季用5200萬歐元買斷佢，仲同佢簽咗7年合約，顯示出對菲力斯嘅信任。但喺半季後嘅今年年初，又將佢外借去意甲。
到咗今個暑假，種種跡象都顯示車路士已經決定唔將佢擺喺計劃之內，包括將佢之前著開嘅14號波衫畀咗其他球員。但問題就係：咁佢仲可以去邊呢？幾日前菲力斯自己開口話想返賓菲加，但賓菲加唔夠錢買斷佢只可以借，而車路士只想賣走佢。沙特球隊、加拉塔沙雷、費林明高同埋阿士東維拉都傳出對佢有興趣，但暫時未知車路士對佢標價幾多，而據報菲力斯並唔打算離開歐洲搵食。
無論去邊都好，菲力斯都要盡快搵到自己喺球場上嘅位置。前鋒嚟講佢埋門唔夠銳利、翼鋒嚟講佢唔夠快、進攻中場嚟講佢又唔夠防守能力。當年喺賓菲加嗰個菲力斯，係喺一個雙箭頭組合入面有個高大中鋒幫佢開路，而其實馬體會初期施蒙尼都係安排佢咁踢。可能同古天奴、占士洛迪古斯呢啲球員一樣，唔太適合現代嘅足球風格吧。又或者，回家吧！
撰文：亞設
法比斯奧追蹤者
