里昂以第6位完成法甲賽季，但因負債太多被罰降班。
(©AFP)
【Now Sports】里昂近日被罰降落法乙，歐洲列強係時候把握機會嚟掃貨喇！
今時唔同往日，里昂由法國其中最大球會之一，變成最近負債太多被罰降班。就算最後打得甩個判罰，都一定要靠賣球員冚返平條數，所以陣中唔少球員都成為轉會搶手貨。當然曼城已經用咗接近4000萬歐元買咗新星卓基，而陣中最高薪嘅拉卡錫迪亦已約滿離隊，慳番唔少人工。
除咗卓基之外，里昂陣中仲有幾位有潛質嘅年輕球員，包括20歲比利時翼鋒馬列科分拿，據報車路士同埋熱刺都對佢有興趣，標價3000萬歐元。21歲加納右翼路亞馬，同埋22歲尼日利亞中鋒基夫奧賓都唔愁冇下家。
里昂陣中都有唔少踢過英超嘅球員，包括阿仙奴青訓產品美倫賴奧斯、克羅地亞中堅查歷達沙、仲有今季外借咗去愛華頓嘅奧希文加拉，應該都會引起英超中下游球隊嘅興趣。
報道話負債超過5億歐元嘅里昂，需要集資最少7500萬歐元先可以留返喺法甲，所以賣球員賺錢可以話係唯一出路。不過置諸死地而後生，來季被迫重用青訓，又焉知非福呢？而對於其他球隊嚟講，埋嚟睇埋嚟揀！
撰文：亞設
法比斯奧追蹤者
