山曹就算喺歐霸盃決賽入波，都說服唔到車路士買斷佢。
(©AFP)
【Now Sports】車路士就算要貼錢都決定還山曹返曼聯，已經證明咗，呢位曾經俾英超豪門爭住要嘅英格蘭左翼，價值已經今非昔比。
眨吓眼已經25歲嘅山曹（Jadon Sancho），上季由曼聯外借去車路士，但表現都冇乜起色。所以車路士唔單止決定唔以2500萬英鎊買斷佢，仲肯畀500萬英鎊罰款送佢返曼聯。背後原因唔只係佢嘅表現唔值得買斷，更多係因為佢唔肯減薪，要知道佢攞緊30萬英鎊周薪。
山曹自己唔想踢曼聯嘅同時，曼聯當然都唔想繼續用咁高人工養住佢。不過呢個數嘅周薪都嚇窒咗唔少本身對佢有興趣嘅球隊，包括意甲嘅拿坡里同埋祖雲達斯。至於山曹曾經兩度效力嘅多蒙特，體育總監基爾已經講咗佢唔係球隊嘅考慮之內。英超入面都有幾支中上游球隊對佢有啲興趣，但係同樣唔肯畀返曼聯嗰份高薪佢。
山曹大可以繼續留喺曼聯履行合約，不過橫掂都係要錢，不如去沙特阿拉伯踢開心足球仲好啦，人工仲可以叫高幾倍𠻹。不過如果想職業生涯重回正軌嘅話，就要減薪去一支有實力有野心嘅球隊再嚟過。25歲仔，呢個決定證明好多嘢。
撰文：亞設
法比斯奧追蹤者
本欄不定期上載
