香港勁揪！
(©AFP)
【Now Sports】既然係5.19之役40周年紀念日，此時此刻，點能夠唔重溫呢一段香港球迷難以忘懷嘅集體回憶，夠大家講一世嘅光輝史？
撰文：球十三
1985年世界盃亞洲區外圍賽，當晚係黃金時段直播，十三當年仲係小學生，難得喺熒幕前睇到大頭仔胡國雄、亞洲第一中鋒尹志強等名將風采，絕對係城中大事。記得當時所住嘅屋苑喺直播期間好嘈，當「細鬼」張志德百步穿楊入世界波，整個屋苑都傳出歡呼聲，到後嚟國足扳平，即刻鴉雀無聲，其後當「木咀」顧錦輝妙射奠勝，所住屋苑簡直地動山搖，嗰份激情，一世難忘。
又記得港隊凱旋當日，大量球迷到機場接機，有人仲拉上「亞洲第一香港隊」嘅橫額，懶理條banner內容有冇言過其實，而「智多星」郭家明亦名動全國。可惜嗰份激情冇耐就因港隊輸畀日本而逐漸冷卻。
40年啦，10年前寫過類似緬懷文章，或者，香港足球水準實在難同昔年比較，可幸仲有1994年世界盃外圍賽贏口碑、2009年東亞運奪金創造傳奇一刻，同埋上年勇闖亞洲盃；可幸每次港隊出賽，我哋仍然齊心，好自豪大嗌「香港勁揪」。
繼續等待類似5‧19嘅代表作。
撰文：球十三
足球迷叫第十二人，冇偏愛，冷眼旁觀係十三。
