鏡頭捕捉到費Sir笑咗。
(©AFP)
【Now Sports】114、120、121分鐘……無論你喜唔喜歡曼聯，隔住熒幕都會感受到呢晚奧脫福有幾熱血，連費格遜都四萬咁口，紅魔躉慶祝之餘，會唔會同佢一樣想當年。
撰文：球十三
當年帶領曼聯贏三冠嘅費Sir係座上客，當哈利麥佳亞頂入奠勝，鏡頭捕捉到費Sir笑逐顏開，同之前好幾場見佢喺看台睇到木口木面，好唔同。問心，曼聯呢幾年，尤其係今季稱得上代表作嘅寥寥可數，球迷睇波甚至係「懲罰」。當今場加時輸緊2:4，到隊長般奴費蘭迪斯入12碼開始轉勢，嗰道氣，確係似曾相識。頭先同寫稿手足度戰果標題，由本來諗住起「曼聯無冠」，到想改「熱血反勝」，都係覺得唔夠，用「大癲」至貼切。
阿摩廉話有睇1999年三冠王紀錄片，受到激勵，只覺得佢做得最啱係用麥佳亞串演中鋒（佢賽後話其實冇得揀，麥佳亞係唯一可以頭槌入波喎）。麥佳亞未奠勝前已經有一次死纏爛打，俾人拉衫博唔到12碼，份鬥心應該都感染到隊友。好熱血，呢場波，甚至呢個盃（贏到嘅話）話唔定救到阿摩廉，救埋隊波。
咪話我潑冷水，畢爾包其實好強，曼聯要過呢關仲難。只知如果場場有呢份拼勁打畢爾包，最起碼又會送兩場好波畀大家睇。
相關文章：
大癲！曼聯加時轟3球贏「里」入4強
https://sports.now.com/home/news/details?id=39180091268
撰文：球十三
足球迷叫第十二人，冇偏愛，冷眼旁觀係十三。
