屈堅斯後備入波。
(©AFP)
【Now Sports】阿士東維拉周六在變陣情況下，作客仍憑3個後備球員建功而以3:0輕取包尾的修咸頓。
經過周中歐聯不敵巴黎聖日耳門後，維拉今仗作出4個調動，阿辛斯奧、阿馬度安拿拿、馬臣及明斯復任正選，至於隊長麥堅先列後備。維拉雖然作客，但攻勢仍遠比頹極的主隊多。
戰至69分鐘，後備上陣的奧利屈堅斯博得12碼，阿辛斯奧主射被救出。4分鐘後，屈堅斯接應長傳挑射中楣底彈入。缺口一破，維拉於6分鐘後再由另一後備兵馬倫禁區內射成2:0。及至補時，麥堅博得12碼，阿辛斯奧主射又被擋出，不過麥堅上前補中射成3:0。
維拉贏波後32戰得54分升上關鍵第5位，只落後第4位的曼城1分，但亦只領先少賽1場的車路士及少賽兩場的紐卡素1分。
