皇馬女足半爆冷獲勝。
(©AFP)
【Now Sports】賽前備受睇淡的皇家馬德里，周日在女子西甲作客以3:1打敗巴塞隆拿，創歷史打敗近年在國內幾近無敵的對手。
兩隊都剛於上周中女足歐聯8強首回合贏波，皇家馬德里於完半場前4分鐘憑列當度接應左路角球頂入打破悶局，巴塞隆拿錯過多次到肉埋門後，於67分鐘扳平，由格拉咸漢臣近門頂入。皇馬全場控球時間遠不及對手，勝在埋門有效率，完場前3分鐘，蓮達卡絲度憑速度壓入禁區然後橫傳予華雅射入。
皇馬主要威脅來自左路，戰至補時又是來自左路的傳中，阿坦妮亞頭槌攻門被護空門後，華雅近門執死雞，雖然又被擋出，實情皮球已越白界，最終皇馬贏3:1，歷來首次打敗宿敵，與排榜首的巴塞分差只餘4分。
