彭馬缺陣 阿仙奴1：0小勝車路士

【Now Sports】阿仙奴憑美連奴上半場一頭定江山，主場1:0小勝有高爾彭馬缺陣的車路士。

周日阿仙奴主場對車路士的英超比賽，阿仙奴有馬天尼斯復任正選；車路士方面則有高爾彭馬因傷缺陣，由柏度尼圖客串出任前鋒。一開波阿仙奴已經主導比賽，兩分鐘先有托沙禁區抽射炒高，其後11分鐘有尤利安添巴右路壓過古古尼也出波，馬天尼利門前疑似被撞跌而未能埋門，最後由迪勤懷斯一射炒高。1分鐘後，迪勤懷斯禁區頂遠射，被羅拔山齊士撲出。

17分鐘，輪到托沙左路拉弓，又僅僅高出，結果戰至21分鐘一次角球機會，由美連奴近柱頭槌一頂破網，領先1:0。領先後阿仙奴繼續在車路士後場控球在腳，33分鐘，阿仙奴中場攔截成功，輾轉間由馬天尼利禁區內拉弓，但炒高而回。36分鐘，車路士終迎來埋門，古古尼也左路看似無力的射門，但拉也接波時甩手，差點慢溜尾袋。車路士尾段反客為主，但無功而還，結果半場阿仙奴1:0領先。

下半場初段雙方中場拉鋸居多，只有柏度尼圖禁區外遠射被擋出。60分鐘輪到阿仙奴進攻，美連奴接應馬天尼利傳中後射門被撲出；4分鐘後，奧迪哥特禁區拉弓又被救出。車路士隨後換入迪斯貝利賀爾和泰歷佐治，力求收復失地，但埋門仍欠奉；阿仙奴戰至73分鐘有馬天尼利6碼點頭槌卻斜出。尾段85分鐘車路士有古古尼也頭槌被救後，阿仙奴成功保持上半場的優勢，小勝1:0完場。阿仙奴賽後29戰得58分，落後利物浦12分。