【Now Sports】紐卡素於周日與利物浦決戰溫布萊，爭奪本屆英格蘭聯賽盃，眼見紐記近年對利物浦的往績慘不忍睹，連球迷都不得不承認處下風。難打，不代表冇希望，且聽香港紐卡素球迷會會長Tammie對決賽的看法。
問：紐卡素決賽勝算如何？
Tammie：紐卡素甚至紐迷都有恐利症！大膽啲講，正常發揮下咩隊都有力一拼，但就係搞唔掂利物浦，決賽仲要缺少幾名主力真係唔太樂觀。好彩剛剛英超贏波將士氣帶到入決賽。近年次次都贏唔到利物浦，希望呢一場可以打破宿命啦！
問：決賽缺少主將，估計有何改變？
Tammie：冇哥頓都算，左邊冇埋今季表現出色嘅賀爾先係最大問題。直接取代哥頓就只有哈菲班尼斯，雖然近排都雪到硬晒，但啱啱對韋斯咸都幾活躍表現算唔錯。其實兩個相比，哈菲班尼斯比較多瓣數，但牽制對手能力就哥頓好啲，希望打番起佢，決賽踢番場爭氣波。
問：決賽應該用樸比定杜巴卡把關？
Tammie：早排表現穩定兼續完約，忽然換番狀態麻麻嘅樸比喺英超打正選的確有啲古怪，如果計聯賽盃8強開始贏賓福特，再喺4強雙殺阿仙奴，杜巴卡都有功勞，估計決賽應該會用杜巴卡。作為香港頭號杜巴卡粉絲，我梗係想見證杜巴正選兼捧盃啦！
問：撇開這場決賽，暫時如何評價紐卡素今季表現？
Tammie：其實尚算可以，的確有啲波要贏但贏唔到，經常上半場好波下半場走樣，要忍受（領隊）艾迪賀維嘅固執，戰術排陣同調動毫無驚喜，但總算入到決賽而聯賽排緊第6，呢一刻係滿意嘅。
問：對聯賽爭前4信心有多大？
Tammie：爭取前4信心真係唔大，因為睇唔到紐卡素有乜本事上到前4。仲有10場比賽都有幾場「6分波」，就算依家排第6距離第4都係兩分，但樓上幾隊得失球好過我哋；又要望樓下幾隊失分，不如做好自己場場當決賽咁踢攞3分先係最重要。講到尾，冇前4都希望有第5，有歐霸點都叫做有少少籌碼下季留得番幾個主力。
問：球迷會今晚決賽有活動嗎？
Tammie：難得入決賽梗係搞啦！亦都要多謝平時去開喺灣仔嘅酒吧，專登為呢場波開夜啲畀我哋上去睇波。
問：若捧盃會如何慶祝？
Tammie：雖然機會渺茫但都要諗吓嘅，太高調又唔想，可能簡簡單單同一班紐迷出嚟食個飯慶祝下囉。
有關香港紐卡素球迷會及今晚睇波活動詳情，可瀏覽：
https://www.facebook.com/hknufc/
