19年的愛圓夢了，多謝你嚟香港。
(筆者提供)
【Now Sports】2025年2月1日，比結婚更緊張嘅日子終於來臨，幻想咗好多日嘅畫面終於成真……
之前一晚完全瞓唔著，到早上一直好緊張。多謝老公抽到呢個見面會嘅入場資格，我仲要好好彩抽中埋卡卡印字嘅賀歲盃波衫。2006年開始，因為你開始睇波，當年13歲撞啱我嘅青春期，真係為你瘋狂咗好幾年。
啲周刊報紙，嗰陣剪起晒留念，輸波我又喊，到轉會皇家馬德里直頭喊濕咗幾個枕頭。即使歐聯凌晨播都場場睇足，睇完就直接返學。我人生唯一的一個真偶像，你做嘅所有嘢都係我嘅role model，但你真係太完美，冇可能追到。
我只能跟你一樣成為一個善良嘅人。聽聞你前一晚喺機場由頭簽名簽到尾，到由尾簽返去頭。多謝你用行動，證明你值得咁多球迷愛戴。
雖然件衫個字溶晒，但呢件係我人生第一件波衫，亦係我最好朋友同我老公夾份送畀我嘅生日禮物。
多謝卡卡你令我進入足球世界，令我識到好多好朋友，同埋我老公。
呢啲係我噚日好想同你講嘅野，但完全冇時間，希望你冇被我件衫嚇親。
19年的愛圓夢了，多謝你嚟香港。
撰文：Sapp Hire
