選舉嘅嘢，只係一場遊戲一場夢。
(©AFP)
【Now Sports】金球獎頒獎禮落幕，西班牙中場洛迪靴蘭迪斯得獎係咪深慶得人？
撰文：球十三
洛迪靴蘭迪斯（Rodri Hernandez）值唔值得贏金球獎，係好主觀嘅事。由好多年前開始，金球獎取決於國際大賽成績，由大賽冠軍成員得獎嘅不成文規定早已消失（2010年西班牙贏世界盃，結果金球獎都係由美斯力壓恩尼斯達同沙維得獎就係明證），但無可否認，洛迪喺曼城又蟬聯英超，同埋贏得歐洲國家盃嘅表現係沉潛內斂得嚟，真係全面，攻守都好有作用。
或者換一個角度睇，當曼城或者西班牙順境，洛迪好似平凡；但當佢唔在陣，曼城失分率大幅提升，狂牛中場亦好似差啲嘢咁。連續兩個國際大賽，即係2023年歐洲國家聯賽、今年歐洲國家盃都由佢當選賽事最佳球員，啲評審唔會一次又一次亂嚟。
再諗深一層，只要睇其他候選人，實在太多攻擊球員，花多眼亂票源分得太散，亦間接幫咗洛迪一把。所以，即使Vini去季幫皇家馬德里贏西甲表現勇猛，而喺歐聯轟6球，包括4強對拜仁慕尼黑同決賽贏多蒙特都有士哥，快放個人突破幾搶眼都好，結果都唔能夠得分最高。
講到皇馬杯葛風波，評審準則有冇偏頗？或者有，但肉眼係睇唔到嘅，佢哋全隊上下杯葛頒獎禮就人人睇得見。喺大家未清楚有冇內情之前，佢哋所做出嘅杯葛行為，或多或少會畀人輸打贏要、有失氣派嘅印象。不過講到尾，選舉嘅嘢，只係一場遊戲一場夢，太認真你就輸。
撰文：球十三
足球迷叫第十二人，冇偏愛，冷眼旁觀係十三。
