個人較鍾意踢中場。
(球會官網圖片)
【Now Sports】噚日對唐卡士打踢到89分鐘終於入到波，並且絕殺對手，心情固然興奮。
撰文：陳頌文
呢場比賽，我哋上、下半場早段都有幾個入球機會，結果絕殺對手，開心之餘同時都為成班隊友感到自豪，因為睇到全隊一齊上上落落，整場比賽踢到尾都冇放棄，最後射入一球攞到3分。
依家自己嘅位置主要係前鋒，踢咗一段時間，比起之前已經再熟習呢個位置。有時都會踢返中場，個人相對比較鍾意踢中場，始終覺得係自己最有利位置同埋最有信心，因為係向住前方踢。踢前鋒，主要都係背住進攻方向踢，攞到波要先轉身，自問背住龍門再轉身呢方面唔係最叻，有時覺得少少吃力。
球隊啱啱贏波，但近況都唔算太理想【編按，暫列英乙北部聯賽第9位】，會方都喺教練方面做咗調配，之前嘅教練因為成績唔理想離開，希望自己可以適應到新教練戰術，繼續幫球隊踢到好成績。
大學開學3個星期，講到點平衡踢波同讀書，其實同之前分別不大，因為大學返學時間比較早，放學返屋企再去練波都有充裕時間，反而可能係要擺返多啲時間溫書，溫習學咗嘅嘢，始終課程都比之前難。
題外話，今年英超爭霸，自己當然都係撐曼城，希望佢哋可以再攞冠軍，不過因為Rodri嘅受傷，機會可能冇咁大，但點都繼續支持佢哋。
撰文：陳頌文
前港隊代表，先後效力曼城青年隊、史篤城預備組與布力般流浪U21，新加盟AFC Fylde。
本欄不定期上載
