【Now Sports】奧運自由泳雙銅牌得主何詩蓓與泳隊隊友今早返抵香港，Siobhan笑言最想休息，然後備戰10月的世界盃泳賽。
在今屆奧運女子100米及200米自由泳俱摘銅牌的何詩蓓返港後即時接受訪問，被問到成為史上最多奧運獎牌的港隊運動員（2銀2銅）時說：「係一個好大嘅honor（榮耀），但係我去奧運嘅目標並唔係希望成為攞得最多獎牌嘅運動員，都係盡自己本份，盡力比賽盡力去游，可以為香港爭光係一個光榮。」
對於未能爭取金牌或銀牌，Siobhan說：「自己就好享受今屆奧運，因為我嘅目標係希望可以好好發揮到自己嘅水準，同埋我成日都話過程比結果更重要。所以過去3年訓練盡咗自己努力，喺比賽中做到自己最好嘅，咁我就覺得冇遺憾。」Siobhan表示明白外間對她表現有不同期望，但並不是她的目標，又強謂較少留意關於自己的報道。
「今年仲有好多唔同比賽，所以暫時喺奧運之後想喺屋企好好休息，take a break跟住之後再返嚟訓練，咁10月中我哋就有世界盃，3站都喺亞洲，所以嚟緊都想為比賽做準備。」
被問到回港後最想做甚麼時，她笑說：「我最想做嘅係瞓覺，因為過去兩個禮拜去到村（選手村）又連續咁多日比賽，其實咁緊張同興奮，夜晚都唔會瞓得咁好。所以好期待嚟緊幾日淨係喺屋企瞓覺，乜都唔做。」
「我同教練講會take一兩個禮拜off，佢話唔得，如果想繼續游就要take耐啲，因為過去咁多年真係冇take一個好長嘅break，所以佢想我好好享受喺屋企嘅每個時間。」
「今次真係希望可以好好享受過程，因為唔知嚟緊仲可唔可以去到下一屆奧運，所以in case呢個係最尾一屆奧運，只想embrace成個moment。」現場記者問她如何運用300萬港元獎金時，她表示未有決定，只盼把部份獎金答謝團隊，而她又表示希望更加多人學習游泳，享受箇中好處及參加比賽。
「因為我喺香港出生、香港長大，喺香港學游水，所以代表香港係理所當然，同埋尤其是今屆奧運之後令我更加肯定，可以代表香港出去比賽係我嘅光榮，尤其做持旗手，跟住喺比賽見到咁多香港人同香港旗，真係好感動。所以當我每次喺泳池見到香港旗或者香港人，我都盡量揮手。」她又表示就算日後以觀眾身份睇奧運，亦希望在比賽見到更多香港運動員，而退役後不會擔任教練，因自問沒有擔任教練的質素，目標是成為一名心理學家。
