卡拉費奧利攻守能力俱備，面對摩迪都冇怯場。
(©AFP)
【Now Sports】意大利球迷，睇完呢晚補時最後一腳追平克羅地亞，心情係咪平復唔到呢？我係囉。係咪好驚險？叫得做意大利躉，慣晒啦。隊波擺到明有不足之處，開心係個別球員好出色，尤其係個新仔卡拉費奧利。
撰文：Malena（燕飛）
意大利今場和波都得，似排3-1-4-2，實際上喺冇波在腳情況下係5-3-2，感覺上仲係侵略性唔夠，面對克羅地亞壓逼踢法好難發揮，吓吓靠死球，好似巴斯東尼助攻頂頭槌至叫有啲威脅。第一個想讚嘅球員自然係當拿隆馬，摩迪球12碼射得唔差㗎，只怪過唔到我哋門神。點知隊友唔爭氣，門神辛苦擋完又擋，竟然都睇唔實摩迪俾佢抽入。
嗰一刻，意大利球迷係咪都同當拿隆馬一樣，好㷫？
當換入我鍾意嘅費達歷高基艾沙，係多咗突破但都冇實際成效。諗住得3分排第3危危乎要等運到，薩簡尼最後一腳波改變一切，夠晒戲劇性。第二個想讚係卡拉費奧利（Riccardo Calafiori）。就算睇意甲嘅球迷都未必好熟悉佢，始終踢嘅只係博洛尼亞，同埋係新晉國腳。
3場分組賽佢都踢得好，就算上場對西班牙擺烏龍都只係欠運；佢今場犀利啦，包抄攔截準，好多腳傳波都到位，結果去到最後時刻，以一個後衛身份好冷靜咁撥交畀薩簡尼，嗰腳波，邊似出自一個後衛？試問點可以唔鍾意佢？22歲小白臉，一早俾人話佢似馬甸尼，又有人話佢似尼斯達，邊個都好，肯定前途無可限量。
總結意大利3場波竟然都係先落後，打慣逆境波都係好事嘅，16強對瑞士又係好難打，我覺得可能要射12碼囉。靠你啦當拿隆馬！
撰文： Malena（燕飛）
現在我老了，人家才說「你很好」。
