【Now Sports】皇家馬德里明日與多蒙特爭霸，sports.now.com特意邀請皇家馬德里香港官方球迷會會長June，以及多蒙特香港官方球迷會會長Crystal接受訪問，由兩個女會長談及愛隊捧盃的理由、估比數及評論愛隊本季表現。
兩名女會長先說出覺得愛隊捧盃的理由，June說：「因為我哋有豐富決賽經驗，希望有啲優勢，仲有係我哋今季攞咗對手個比寧咸，佢冇理由唔做返啲嘢。聽講我哋贏咗，畀佢哋嘅錢會多過由佢哋自己贏冠軍【詳見編按】，所以應該覺得由我哋贏更加著數（說罷兩人齊大笑）。」
Crystal則謂：「首先係萊斯喺多蒙特最後一場波，未知佢賽後會唔會退役，我諗全隊上下一心都想為佢捧盃，畢竟佢都係一個悲劇人物。另一樣係上一次歐聯決賽（2013年）飲恨，會避免重蹈覆轍。另外，雖然我哋似黑馬，但殺到入決賽證明有機會。」
談到勝負關鍵，June認為皇馬贏波與否視乎防守：「我哋後防比較弱，呢排都自爆緊，希望決賽好啲。同埋我哋前線把握差啲啲，嗰次（4強對拜仁慕尼黑）好彩荷西路把握到，其實平時你餵佢10球得1球把握到。入到決賽冇弱隊，邊隊把握到就可以贏。」Crystal緊接說：「咁我係咪應該要防守好啲，等佢哋冇咁易把握到？對我嚟講，從來重要嘅係心態，多蒙特係一支心態需要加強嘅球隊，尤其皇馬大賽經驗咁豐富，我哋球員比較年輕，未必有太多大賽經驗，一場過更加考驗佢哋嘅抗壓力。當然，一場過比賽，如果運氣好啲一樣會贏。」
皇馬的比寧咸與巴西雙煞雲尼素斯、洛迪高都具威脅，問Crystal估計愛隊如何防禦時，June搶先插嘴：「比寧咸佢哋應該好熟！」Crystal答道：「都係嘅，知己知彼。佢愈近禁區威脅愈大，所以最好方法係令佢遠離禁區。至於兩個巴西球員，如果我哋翼鋒打順啲，衝下佢哋兩閘，變咗佢哋要多啲回後場。」Crystal一再強調多蒙特今季防守勝去季，尤其有當勇後衛侯姆斯壓陣，所有有信心對抗皇馬鋒將。
山曹回巢多蒙特後翻生，June說：「因為曼聯啱啱捧盃（英足盃），會更加激發佢做啲嘢證明自己。希望我哋後衛可以做到防守曼城咁，令佢入唔到禁區，入唔到禁區就要靠個人能力同埋射世界波，咁就令佢減低威脅。」June又估計多蒙特球員會為萊斯製造入球機會，不過主要還是打整體戰，踢防反，另外需要防範曉姆斯的後上助攻：「我哋球員矮啲，所以set piece（死球）會比較危險。」
訪問其後進入互相發問環節，Crystal問：「反而唔係好關呢場波事，我係好奇皇馬不嬲係一隊好多聲音、具爭議嘅球隊，好似我哋以前都話『喂！插水』，點解仲要鍾意呢支球隊？」June回應：「插水呢樣嘢好主觀，就算依家比寧咸嚟咗都有人咁講，但你哋之前都熟識比寧咸，佢係咪真係嚟皇馬多咗插水呢？我哋係唔係演藝學院令佢學識呢樣嘢？我覺得唔係。好少人三更半夜睇西甲，又話黑哨，我覺得有睇你就知，冇睇就好易被資訊混淆。樹大招風，贏得多就好易被針對。」
「點解我仲鍾意？我覺得隊波贏之餘，就算落後去到完場前都氣定神閒。連我自己都淡定咗，80幾分鐘落後會同自己講『唔緊要』，去飲杯水先，返嚟就冇事。係嗰種令你覺得相信佢嘅感覺，你知道佢哋會盡力，唔會hea踢，呢個信念係令我覺得鍾意。」June續道。
輪到June向Crystal發問：「全世界除咗我哋都想睇萊斯捧盃，因為最後一場。你頭先話佢係悲劇人物，你覺得佢會唔會出場？如果唔出又會唔會好遺憾？」Crystal回答：「我覺得一定出，爭在出幾耐，最好畀佢踢正選啦。如果唔出一定係遺憾啦，對球迷嚟講都係，大家都想佢有個happy ending。」
緊接是估比數時間，June聲稱「大膽估贏3:1」，而Crystal認為會打和1:1，互射12碼由多蒙特贏5:4。
雖然未知決賽鹿死誰手，但June正面評價愛隊今季成績，甚至認為已超出預期：「賓斯馬走咗後又唔多買人，又唔知『麥總』（安巴比）嚟唔嚟，就咁入個荷西路……，以為只係無目標，呢季為儲錢，等到巴黎奧運後『麥總』就過嚟。點知碌碌下又碌得幾好，我覺得今季係OK。當然爭最後一步都係貪心，希望今季雙冠完成。」
至於Crystal說：「好難一概而論，聯賽真係唔合格，因為對前4球隊只係贏過1場，上次跌出前4係2014/15年，高普最後一季。歐聯就真係100分，最初抽到死亡之組以為玩完，點知防守好穩，守到個分組首名出嚟，之後對馬德里體育會同埋巴黎聖日耳門都把握到機會，嚟到呢度。以前我哋有前冇後，但今年防守好大突破，冇乜可以挑剔。」Crystal認為侯姆斯是球隊本季最佳球員，為他未能入選德國EURO大軍感到可惜。
June則選擇卻奧斯為皇馬今季最佳球員：「可能有比寧咸喺前面，佢容易啲喺後面控制中場，所以啲pass仲係好準。我哋球迷形容佢有一招叫『仙人指路』，佢指一指，雲尼素斯就跑入嚟，呢下攻擊其實好強。我諗佢覺得可以教嘅嘢都教晒畀人，所以可以走，佢講過唔想啲人喺佢踢得唔好嘅時候至記得佢，希望有個好嘅memory。」
兩間球迷會明晚分別舉辦睇波活動，而且都會派發禮物，Crystal笑言「歡迎所有唔係捧皇馬嘅人嚟」，而June已身在英國，準備帶同每次觀看歐聯決賽必帶的必勝旗，以及吉祥物公仔入場為愛隊打氣，亦考慮拍片把現場氣氛帶給球迷會成員。
【編按：據報皇馬去年引入比寧咸時，合約列明若贏歐聯會給予多蒙特2500萬歐元，比多蒙特決賽贏波所得的2000萬歐元更多。】