0
0
紐卡素球迷會:來港大軍陣容有誠意

紐卡素球迷會:來港大軍陣容有誠意

球迷會代表接機以示支持。 (筆者提供)

【Now Sports】咁多年嚟紐卡素嘅青訓真係麻麻,上得大枱嘅一隻手數得晒。嚟過香港7人賽後有機會喺英超嶄露頭角嘅,應該得杜米特同朗史達夫兄弟,其餘真係完全唔起眼。鍾意紐卡素,對一隊成員瞭如指掌好正常,但一班幼齒通常被忽略。

撰文:杜巴卡夫

近年開始變「幼齒控」,嚴重程度就算冇一隊比賽,都會專登走去睇佢哋比賽。對於有面盲症嘅我,每次佢哋嚟香港前都好努力咁背名同認樣,目標係見到佢哋嘅時候,可以逐個噏得出佢哋個名以示尊重。今次大軍陣容都算有誠意,比起上年更加有睇頭,即管睇下呢班被喻為好高質素嘅幼齒可以行到幾遠!

要推介嘅就一定係艾菲夏里遜(Alfie Harrison),呢個年輕球員由曼城加盟,一班紐迷已經對佢期望甚高,最估唔到以佢名氣竟然會嚟香港踢7人賽,今年成績如何,相信佢係關鍵之一。我就比較鍾意亨治利(James Huntley),始終對自家青訓有情意結,而且喺佢上年嚟完香港後一直同佢保持聯絡,佢喺預備組比賽前後都會吹幾句,真心希望佢將來可以成材。以下係今次嚟香港嘅主力球員名單,大家不妨睇下,從而對佢哋了解多少少:

阿當夏利遜(Adam Harrison)

年齡:17歲

位置:門將

去年夏天加入紐卡素青訓,據聞偶像係古圖奧斯。今季為紐卡素U18上陣16場,包括在UEFA青年聯賽對AC米蘭,而舊年主場對AC米蘭亦納入後備席。

盧根禾斯(Logan Watts)

年齡:17歲

位置:中堅

司職中堅亦可踢兩閘,似乎後上能力應該唔錯,因為今季已攻入4球。今年3月對米杜士堡首次為U21隊亮相,其後亦有跟一隊操練。

哈利包維(Harry Powell)

年齡:17歲

位置:中堅

由Gateshead FC Juniors嚟紐卡素青訓,佢嘅孖生細佬Rory都係紐卡素青訓。現役U18隊長,今年亦提升過上U21隊對新特蘭。

艾菲夏里遜(Alfie Harrison)

年齡:18歲

位置:中場

喺名單中應該係名氣最大,亦估唔到竟然會嚟香港,同時喺較早前贏得Northumberland Senior Cup其中一員,以佢實力,今年7人賽表現應該有啲睇頭。

占士亨特利(James Huntley)

年齡:20歲

位置:中場

8歲已經加入紐卡素,上年有嚟香港踢7人賽,今年作客巴黎聖日耳門時出任過後備。上年攞到盾冠軍亦都係佢喺補時階段建功,當時兼任龍門一路引球推進,遠程炮收死李斯特城門將。

莊尼艾馬臣(Johnny Emerson)

年齡:18歲

位置:翼鋒

13歲加盟紐卡素,代表過蘇格蘭U18同U19,舊年喺UEFA青年聯賽絕殺PSG。話說筆者上年同幾個紐迷去咗Benton睇U21比賽,同一名外籍人士有傾有講,見佢幾好波我哋都有讚下佢,完場前佢同我哋講“Thank you for the complements, that's my son, Johnny!” (多謝讚賞,那是我兒子莊尼!)

達倫彭馬(Darren Palmer)

年齡:18歲

位置:翼鋒

外號Daz嘅彭馬係U18隊常規隊長,一班青訓教練對佢評價甚高,覺得佢2022年加盟後一直進步,今年亦喺U21上陣好幾次。

史堤芬臣(Dylan Stephenson)

年齡:21歲

位置:中場

今年頭外借到國家北聯賽嘅South Shields FC,上陣18場錄得8個入球1次助攻,呢一季表現非常出眾,令到人家領隊Dickman希望可以將佢收歸旗下。喺4月完成借用期返到紐卡素,為U21上陣亦都有波入,6月合約將到期,但續約方面冇乜進展,似乎同Dickman再續前緣機會相當大。

桑尼夫(Sean Neave)

年齡:17歲

位置:前鋒

另一被寄予厚望嘅幼齒,今季為U18隊攻入13球,成為球隊神射手。喺UEFA青年聯賽同FA青年盃同樣有進帳,相信今年7人賽入波應該冇難度。

祖爾比臣(Joe Brayson)

年齡:17歲

位置:前鋒

對於祖爾比臣,大家應該冇乜印象,因為曾經效力紐卡素但冇出過場。外號Brassy入球能力都唔算差,佢嚟緊呢一年嘅目標係繼續努力,可以喺U21隊處子登場。

其實呢兩年我哋都有去接機,明白一班球員坐12個鐘頭嚟香港一定好攰,未必想social,我哋都會尊重佢哋,完全冇要求影相簽名,純粹等佢哋知香港有班紐迷,係對呢班小朋友好似對一隊成員一樣咁支持。噚日喺操練時見佢哋幾認真,感覺上佢哋嘅默契同質素比上年提升,所以今年期望可以重奪上年失落嘅盃賽冠軍。

早兩日已經喺球迷會page召集,等多啲人入場同佢哋打氣,著黑白主場波衫就基本,另外我哋會喺佢哋出場位置掛幾支旗。另外,準備咗幾支大旗,到時搖旗吶喊同唱歌。最後一句,跟住紐卡素嘅冰水真係傷兵滿營,希望呢班幼齒贏到獎盃之餘,亦都冇傷冇病。

撰文:杜巴卡夫

香港紐卡素球迷會代表

香港足球會7人足球賽

日期:5月24至26日

地點:香港足球會

紐卡素賽程如下:

25/05 15:44 紐卡素VS大埔

25/05 16:52 紐卡素VS李斯特城

25/05 18:34 紐卡素VS新加坡木球會

【編按:香港足球會7人足球賽為香港旅遊發展局重點推介的體壇盛事,共16隊參加主賽事。】

  1. 更多
  1. 丘應樺稱引入640間企業 料可超額完成施政報告目標
    丘應樺稱引入640間企業 料可超額完成施政報告目標
    46分鐘前
  2. 【招聘啟事】Now新聞台誠聘以下職位
    【招聘啟事】Now新聞台誠聘以下職位
    18分鐘前
  3. 香港迪士尼首季盈利創歷史新高 學者認為無迫切性再擴園區
    香港迪士尼首季盈利創歷史新高 學者認為無迫切性再擴園區
    48分鐘前
  4. 肯尼亞通過加稅法案觸發衝擊國會 據報警方開槍鎮壓釀最少13死
    肯尼亞通過加稅法案觸發衝擊國會 據報警方開槍鎮壓釀最少13死
    49分鐘前
  5. 【天氣報告】(6月26日)
    【天氣報告】(6月26日)
    1小時前
  6. 【歐國盃戰報】(6月26日)
    【歐國盃戰報】(6月26日)
    1小時前
  7. 美俄防長通話 別洛烏索夫警告美國軍援烏克蘭將令局勢升級
    美俄防長通話 別洛烏索夫警告美國軍援烏克蘭將令局勢升級
    1小時前
  8. 維基解密創辦人阿桑奇於塞班島法院承認控罪 料稍後獲釋
    維基解密創辦人阿桑奇於塞班島法院承認控罪 料稍後獲釋
    1小時前
  9. 外電:美團考慮發債集資 發債規模或逾10億美元
    外電:美團考慮發債集資 發債規模或逾10億美元
    1小時前
  10. 思捷環球正洽售商標及大中華地區的主要域名
    思捷環球正洽售商標及大中華地區的主要域名
    1小時前