【Now Sports】皇家馬德里帶到離行離列重奪西甲、基朗拿以奇兵身份鎖定歐聯席位,都仲未講到畢爾包勇奪國王盃,就算球季未完都夠埋單,今季西班牙波多驚喜,好睇!
撰文:球十三
多得宿敵巴塞隆拿帶挈,皇家馬德里提早4輪篤定封王。或者你會話,皇馬贏西甲有咩出奇 ?依家講當然唔奇,仲要係實至名歸㖭,但回想唔夠一年前當「賓球皇」賓斯馬宣佈離隊,應該唔少人對其他攻擊球員接唔接到棒存疑。
結果證明呢個疑慮,係多餘。單係計巴西孖寶雲尼素斯、洛迪高,仲有個估唔到初上「馬」就踢到曉飛嘅比寧咸,夠晒一眾對手受(依家拜仁慕尼黑都受緊),贏埋歐聯做雙冠嘅行情一直高漲。
皇馬奪冠固然要恭喜,更值得恭喜係基朗拿。最初大家以為只係季初急先鋒,點知一路保持水準,終於以一場贏巴塞隆拿4:2嘅漂亮勝仗,篤定創會93年嚟首個歐聯席位,官網完場即時出圖喺「歐聯土地」上插旗,而現場即時播放歐聯音樂,畀球迷提早感受氣氛,再睇埋個肥佬球迷高舉一個假嘅歐聯獎盃(圖)……就算唔係身處現場,都感受到氣氛有幾high。
至於畢爾包上個月喺國王盃決賽擊敗馬略卡,得到40年來首個冠軍,全隊上下喺奈维恩河開P,重溫當年「Gabarra」出海巡遊一幕,但見兩岸成千上萬球迷放煙花,搖旗呐喊,夠佢哋球迷講一世。
巴塞隆拿係咪一無所有?沙維明明事先張揚劈炮,又突然決定留任實在太出人意表,而隊波今季成功提拔也馬、古巴斯呢啲後起之秀,一樣畀到大家驚喜,隊波前景都係樂觀嘅。
撰文:球十三
足球迷叫第十二人,冇偏愛,冷眼旁觀係十三。