【Now Sports】「12碼，一係入、一係唔入！」對參加歐洲國家盃的球隊來說，互射12碼也是同一道理：一係贏、一係唔贏！
歐洲國家盃在1976年首次引入互射12碼規例，廢除舊有加時分未分高下以擲毫決定勝負的賽制，12屆決賽周合共80場淘汰賽，互射12碼分勝負的情況，總共出現過22次。
當中意大利參與度最高，歷來7次互射12碼雖然落敗過3次，但上屆他們就在決賽射贏英格蘭，同時亦令英格蘭成為歐洲國家盃決賽周射輸12碼次數最多的球隊。
除意大利之外，射12碼贏過4次的還有西班牙。值得一提，捷克歷來射3次贏3次，勝出率百份百，當中1976年的決賽，更加憑互射12碼擊敗前西德，高舉冠軍獎盃。
