曼聯眾小將成贏波關鍵。
(©AFP)
【Now Sports】 曼聯憑加拿曹個人梅開二度，加上壽星仔海倫的入球，主場3:0擊敗韋斯咸。
周日曼聯主場對韋斯咸的英超比賽，曼聯比起對上一場對狼隊的陣容，作出了一個調動，由哈利麥佳亞替代華拉尼任正選。韋斯咸方面，1月加盟的防中加雲菲臘斯，今戰先列後備。
曼聯初段較為積極，壓上前組織攻勢，先有般奴費蘭迪斯一記禁區外遠射，被門將阿希奧拿撲出；韋斯咸方面亦有蘇捷接應角球頭槌埋門，6碼點位置省中艾格特改變方向，安拿拿回身撲出。曼聯埋門次數上較韋斯咸少，但卻先開紀錄，卡斯米路中前場搶贏控球交予周日21歲生辰的海倫，後者左腳推順右腳抽射破網，23分鐘紅魔領先1:0。韋斯咸落後加強進攻，先有賓莊遜遠射被撲出，30分鐘古度斯接應隊友傳中頭槌埋門，又敵不過安拿拿十指關。臨完場曼聯有海倫左路接應加拿曹短傳窄角度埋門射中網側，結果曼聯半場領先1:0返回更衣室。
下半場一開波，韋斯咸把握麥佳亞的失誤搶得控球，但艾馬遜左路越推越窄下炒高，錯失扳平機會之餘，曼聯隨即有加拿曹右路射門艾格特改變方向入網，曼聯49分鐘領先2:0。韋斯咸再落後下先有艾馬遜56分鐘近門再射失，68分鐘查洛保雲單刀機會被達洛治飛鏟擋走。尾段菲臘斯中圈位置被麥湯文尾搶走控球，曼聯隨即快攻，麥湯文尼交右加拿曹埋門得手，84分鐘曼聯領先3:0至完場。