【Now Sports】在訪問前，勞烈斯（Vas）相當「貪靚」地整理髮型，才願意讓編者拍照，一旁的職員也在竊笑他非常姿整。不過沒想到他比編者更挑剔，多番笑言自己樣子「唔得」，不斷要求重拍，他多番撥髮斂容下，才拍下一張讓他滿意的照片。
Vas對足球的努力如同對髮型般執著，他深知過去一段很長時間是球會邊緣人，實力不足且難登大雅之堂，亦被球迷戲言是「後防炸彈」。但百煉成鋼，褪舊而塑新，他過去兩季於中超的表現脫胎換骨（上季場均封阻及解圍次數位列中超首位），成為球隊中流砥柱，更於前年的東亞足球錦標賽戴上首頂港隊喼帽，他指由細到大的目標是代表港隊上陣，足可圓夢的感覺非常美妙，至今也刻骨鏤心。
「為香港隊上陣係無比嘅光榮。」
現年28歲的Vas坦言：「即使我有英國及墨西哥血統，但一直都喺南丫島長大，係一個地道香港人，我對呢個地方有好大歸屬感，能夠貢獻返畀呢個地方，我覺得係對呢個地方嘅回報。由17歲開始已經立志要為港隊上陣，所以依加諗返起兩年前為港披甲嗰一刻，非常特別。作為一個球員可以為自己家鄉踢亞洲盃呢啲大賽嘅感覺好唔真實，但比起呢份夢幻感更大嘅就係嗰一份光榮，因為香港係我嘅屋企。」
話說回來，被問及備戰狀況時他用「sharp」來形容港隊狀態，「球隊依加上上下下都好正面，氣氛好好，士氣一流。」他直言並不擔心現時即使因傷患致兵源出現變動，指本身傷患已接近9成痊癒，並與艾里奧及周緣德等新中堅拍檔有著頗佳默契，有信心可以好好合作。
談到對亞洲盃有何期望時，Vas對再次與同組伊朗的艾斯蒙及達利美交手感到興奮，「佢哋係擁有歐洲水平嘅射手，你會睇到佢哋點踢，係完全唔同水平，所以應付佢哋係唔容易嘅事。但我鍾意挑戰更強對手，能夠習慣佢哋嘅節奏，之後嘗試跟上，最終跟到佢哋速度，做到就係好大進步。」
該名本土鐵衛在中超舞台，與不少世界級球星如奧斯卡及費蘭尼等交手，深明港隊與世界一流球隊是霄壤之别，被問及亞洲盃目標時，他相當務實地說：「我哋一定要先做好防守，同組3支隊伍嘅實力都好強，尤其係老對手伊朗。我哋上場對伊朗嘅世盃外明顯係跟唔上個速度，呢個係差距，要拉近個距離，深壁固壘係少不免嘅事，我哋嘗試爭取以小組最佳第3名出線。」
「今次亞洲盃我哋一定唔係強隊，但唔可以去諗以前輸波嘅比賽，只有專注當下先可以走得更遠。香港係一個成日畀到驚喜人嘅地方，我哋一定可以係呢次亞洲盃再次震驚世界。」
在訪問結束後，編者邀請勞烈斯寫下一句今次亞洲盃想向球迷說的話：
「THANK YOU FOR YOUR SUPPORT」
Vas：「有好多嘢想同你哋講，我其實好鍾意喺香港主場比賽，有好多『屋企人』同我哋打氣，係你哋畀到力量我哋落場比賽，真係好多謝你哋嘅支持，好希望今次亞洲盃你哋繼續做我哋後盾，因為We are all together。」
香港隊將於明晚10時半，在今屆亞洲盃首場分組賽挑戰阿聯酋。
*編者：本來想邀請勞烈斯全程用廣東話做訪問，但佢對自己嘅廣東話非常無信心所以唔肯，隔籬嘅安永佳就話自己講得好過佢；不過Vas喺訪問都講咗一兩句廣東話而且係幾流利吓，哈哈。
【貳港亞洲盃】潘沛軒：相信便成真
https://sports.now.com/home/news/details?id=38879246152
【叁港亞洲盃】「輝」盡全力探戈 但求落幕無悔
https://sports.now.com/home/news/details?id=38879651682
