【Now Sports】網上熱傳《足球小將》漫畫即將結束，若然係真，代表陪伴大家四十幾年，大大話話跨越兩代人嘅傳奇告終，但其實個故事永遠唔完，不能更完美。
撰文：球十三
高橋陽一先生嘅《足球小將》當然深入民心，喺香港30歲以上嘅朋友，有邊個唔識大空翼（戴志偉）、日向小次郎（小志強）同若林源三（林源三）？咩衝力射球、猛虎射球、雷獸射球、一飛衝天彈跳射球、鳥籠戰術、雪崩戰術……統統琅琅上口。
當消息一出，球迷同動漫迷喺網上議論紛紛，都未等官方證實就開始緬懷。十三都冇例外，最掛念1990年代等友人喺信和買連載影印本後即時借（搶）嚟睇，先睹為快嘛！當然自己亦買過唔少中文版漫畫，只係成日認定長畫長有，冇好好珍藏，借既借（通常冇回頭）、丟嘅丟。呢晚想回味，霎時間喺櫳底只搵返好少，反而搵下搵下，搵返《足球小將》遊戲盒帶，我喺紅白機年代買嘅第一個遊戲。
故事方面，最鍾意太陽王子葵新伍登場揭開序幕嘅《世青篇》，之後一路講班人外流嘅故事亦精彩；人物方面最鍾意日向，畢竟性格比較立體，對宿敵大空翼屢敗屢戰，到中學篇最後一年喺全國大賽終死拚到雙冠軍，皆大歡喜。
記得佢初登場死撞爛撞似茅躉，實情係一個努力幫補家計嘅暖男，最深刻係佢寒冬送貨後，街坊送上熱湯嗰幕。高橋先生力透紙背，人情味滿瀉。正因為太深刻，陪伴大家成長，就算漫畫其後發展開始有啲堅離地、畫下停下，但只要有新情節新篇章，大家風雨不改，翹首以待。
整個漫畫對日本人嘅影響自然深遠，日本喺1993年世界盃外圍賽飲恨儼如國殤，呢一幕喺佢筆下格外滄涼。漫畫中一眾主角追求夢想，激發無數日本球員發奮圖強。嚟自世界各國嘅粉絲亦好多，強如世界級球星迪比亞路、阿古路都受到感染。
日本國家隊近代勁到癲，一早衝出世界，相信將繼續追夢，影響所及一代傳一代。大家亦寄望高橋先生有份經營嘅南葛SC，總有一日踢上J League。所以就算漫畫結束，夢想繼續，現實追夢篇章會一直寫落去……
撰文：球十三
足球迷叫第十二人，冇偏愛，冷眼旁觀係十三。
