【Now Sports】暫列英冠第6位的「黑貓」新特蘭，下周末（6/1）在英足盃第3圈越級挑戰東北死敵紐卡素，今次《球迷會請入》特意邀請新特蘭香港球迷會代表受訪，提前論戰一番。
Q：新特蘭下星期六喺英足盃大戰紐卡素，點睇呢場東北打吡大戰？勝負關鍵係咩？
總體嚟講呢場波都係三七開，而且新特蘭缺少一個正前鋒，早排又入球荒，紐卡素自從沙特阿拉伯財團入主後，實力已經不可同日而語，雖然我哋近年都已脫胎換骨，不斷進步，但雙方仍有非常明顯嘅實力差距；加上過去幾次嘅東北打吡佢哋都未贏過，對佢哋嚟講今次係非贏不可嘅牙骹戰，因此呢場波對新特蘭而言絕對係極之難踢。之不過英足盃向來都係爆冷溫床，而且隨著新帥上任，球隊打法可能改變，或者可趁對手未摸清我哋打法而乘機偷雞，希望呢隊青春班可以帶畀我哋球迷一個大驚喜啦！
Q：可否揀3個本世紀最具代表嘅新特蘭球員？
菲臘斯——目前唯一獲得歐洲金靴獎嘅英格蘭球員；卡達莫——效力新特蘭10年之久，踢法火爆熱血，係球迷寵兒；迪科爾——效力時間雖短但表現非常出色，而且佢同Bradley Lowery嘅故事，令佢同新特蘭之間增添一層特別嘅關係。（仲有想提一提佐敦軒達臣，佢近年算係新特蘭青訓入面成就最高嘅一個，攞過歐聯、英超，同埋歐洲國家盃亞軍，希望佢最尾幾年返新特蘭掛靴。）
Q：目前陣中又有咩焦點球員？
積奇勒——呢個列斯聯出身嘅翼鋒係新特蘭近兩季進攻重心，突破能力強亦擅長埋門，今季已經入咗超過10球；祖比比寧咸——相信唔少人因為佢哥哥（比寧咸）先識佢，但佢今季喺新特蘭其實都踢得好好，打法同佢阿哥有幾分相似，假以時日絕非池中之物；柏達臣——年僅23歲自家青訓門將，表現穩健絕少犯錯，而且救12碼亦有一手。
Q：球隊近年喺英冠甚至曾跌落英甲，問題喺邊度？來季重返英超信心有幾大？
當時嘅新特蘭由於管理不善同亂咁洗錢，令球會戰績嚴重下滑，收入減少，最終因財困冇錢增兵下人材凋零以致連降兩級，有球迷更稱呢種情況為「新特蘭模式」。不過好彩嘅係，當時班主Ellis Short自覺對球會有所虧欠，主動出售球會並幫球會償還過億英鎊欠債，先令球會免於破產。
及後幾經轉折，新特蘭被依家班主Kyril Louis-Dreyfus收購，佢引入類似白禮頓嘅營運模式後令球會重生，先從英甲升返上英冠，而且球隊仍然成長當中，充滿活力，只係稍欠經驗，相信就算今季升唔到班，下季升班嘅機會都唔細。
Q：可否簡介一下你哋球迷會群組？
新特蘭香港球迷會Sunderland AFC Hong Kong Fans Club成立於2015/16年，由名宿奇雲波爾（Kevin Ball）擔任榮譽主席，係球會官方認可嘅組織。我哋希望可以提供一個合適而又完善嘅中文平台，畀一眾支持同留意新特蘭嘅球迷交流情報、分享意見及舉辦活動。球迷會都成立咗一段唔短時間，但係球迷會成員一直都只係維持不超過20人嘅規模，而且因近年香港環境轉變，有唔少球迷會成員都離開咗香港，以至到球迷會唔少活動如足球隊比賽及睇波團等都受到影響。之不過因為「不離不棄新特蘭」呢一套紀錄片嘅推出及球隊戰績回升，最近又多咗少少年輕嘅新特蘭支持者加入，球迷會亦都變得熱鬧咗啲。如果入到升班附加賽，或者英足盃對英超隊，會約下出嚟睇波。
Q：畢竟唔係英超球隊，你哋群組成員點樣可以咁多年都聯繫到？
因為唔少成員都唔喺香港，我哋主要都係响球迷會WhatsApp群組，繼續保持聯繫。
Q：可否推介一個與你們友好的本地球迷會/群組？
查爾頓香港球迷會。
相關文章：
【球迷會請入】拖肥躉分享「愛」的感人故事
https://sports.now.com/home/news/details?id=38873223902
【球迷會請入】熱刺香港：有力與曼城一戰
https://sports.now.com/home/news/details?id=31438435171
【球迷會請入】日本隊香港球迷會：上田係亞洲盃首席中鋒
https://sports.now.com/home/news/details?id=38866088790
【球迷會請入】「巴」「皇」躉齊貼愛隊贏2：1
https://sports.now.com/home/news/details?id=38860555972
【球迷會請入】般尼從來不易！
https://sports.now.com/home/news/details?id=38858783508
【球迷會請入】國米躉：杜林可能一季入20球
https://sports.now.com/home/news/details?id=38855185797
【球迷會請入】棒球大聯盟：上屆港隊已不再捱打
https://sports.now.com/home/news/details?id=38852821552
【球迷會請入】拿玻里躉：快啲搞搞條防線！
https://sports.now.com/home/news/details?id=38850680695
【球迷會請入】德友：為重召湯馬士梅拿驚訝
https://sports.now.com/home/news/details?id=38848258625
【球迷會請入】，歡迎各球迷會與群組分享你們的故事與活動，不妨到「球十三」fb專頁留言。
