【球迷會請入】拖肥躉分享「愛」的感人故事

卡法路雲拍片表揚糖迷善舉。 (Facebook截圖)

【Now Sports】香港愛華頓球迷專頁「拖肥工廠」早前去信愛華頓球會，表揚患癌糖迷的感人善舉，得到會方回應，安排射手卡法路雲拍片致敬（見相關資料），且聽「拖肥工廠」Jimmy說出箇中由來。此外，愛華頓似乎已走出被扣10分的陰霾，近3戰全勝，Jimmy認為反而激發「-10的士氣」。

Q：得知你們早前去信愛華頓會方表揚患癌糖迷，可否說說事件始末？

早前有個不幸患上癌症嘅糖迷，向香港兒童癌病基金捐出80萬元，我向球會寫信，希望球會可以表揚佢嘅善舉，有幸獲得球會積極回應，並安排前鋒卡法路雲拍片向佢致敬同打氣。

我都希望藉呢個故事，同廣大愛華頓球迷分享呢份嚟自拖肥嘅愛，希望都鼓勵大家面對任何困難。呢次經歷亦都證明愛華頓毋負The People’s Club稱號。

Q：愛華頓近3戰全勝，升勢原因是甚麼？

扣分事件之前，愛華頓球迷同球會管理層，以至潛在新班主處於對立關係，球隊亦受呢個氣氛影響，表現唔到以往葛迪遜地獄主場嘅威力。不過，扣10分令球隊上下同仇敵愾，大家都被呢件事團結，士氣即刻返晒嚟，球員一人跑多步，球迷個個都嗌大聲啲，大家都盡百二分努力令球隊重回正軌。最近隊波表現大幅改善，唔多唔少都係靠扣10分帶嚟嘅「士氣buff」而得嚟。

Q：如何評價被扣分事件？

首先扣分嘅決定本身就極之荒謬，球隊財政同管理嘅失誤，冇理由要用球隊喺體育表現得嚟嘅分數賠償，而當年樸茨茅夫破產被接管只係被扣9分，愛華頓因為超過FFP所定虧蝕限額1950萬鎊而一下扣10分，刑罰嚴重程度都係不成比例。

FFP入面嘅Profit and Sustainability Rules口口聲聲話要維持英超球隊嘅可持續發展，但出嚟嘅罰則係扣咁多分，威脅愛華頓喺英超生存空間，而萬一降班，最直接嘅影響係導致球會收入減少，削弱球會收入同還債能力，令球會更難以持續經營。所以，我認為扣分事件反映FFP罰則嘅荒謬之處，亦都證明FFP只係用嚟打壓中小型球會嘅工具，令中小型球會顧忌違反FFP而唔敢大額投資。因為大額投資未必可以即時令戰績得到相應提升，而違反FFP就有機會面臨被扣分嘅懲罰。

Q：估計愛隊最終以甚麼位置完季？

因為今年3支升班馬實力相對較弱，就算最後真係維持原判扣10分，護級應該都還可以，估計排名係15或16左右。

Q：請講出今季至今表現最出色嘅球員。

今屆個人認為3名球員表現格外出色，分別係門將碧福特，左閘米哥倫哥同中場杜古希。首先碧福特左飛右撲屢救險球，係近幾場保持清白之身嘅大功臣；米哥倫哥防守滴水不漏，進攻上開始識壓上同隊友配合，幫手拉空位，更加有兩球進帳，一改以前守強攻弱形象；最後就係今季球隊暫時神射手杜古希，基本上全場攻守都可以見到佢嘅身影，領隊戴治嚟到拖肥為咗加強攻守效率，放棄一貫沿用嘅442陣式，用佢做第二前鋒，打4411陣式。若要選最出色，我會揀今季脫胎換骨，攻守都有表現嘅米哥倫哥。另外如果有最佳年輕球員獎，個人會揀中堅班夫韋治，先天1.95米嘅身高，令佢身形上已經佔有優勢，但佢一啲都唔論盡，用波好穩定，假以時日必成大器。

Q：可否簡介一下你們fanpage/群組？

「拖肥工廠」成立於2018年，嗰陣讀書有時間就膽粗粗開咗呢個page以球會友。現時專頁主要由我管理，都係發表對球隊嘅分析，以及有比賽就開即時討論post。專頁暫時有900幾個followers，涵蓋唔同年齡層嘅拖肥迷，每逢比賽日都有唔少拖肥迷一齊傾波經。除咗香港拖肥迷外，都有啲台灣嘅拖肥迷有follow「拖肥工廠」，並且留言比咗好多精闢分析，在此想特別多謝台灣糖迷嘅貢獻。

Q：可否推介一個與你們友好的本地球迷會或群組？

最常交流嘅係韋斯咸page「鎚仔幫主場」，大家對領隊莫耶斯都非常熟悉，而且page走嘅路線相近，所以都有唔少交流。另外當然仲有般尼香港球迷會，除咗領隊戴治上咗兩隊神枱之外，般尼換上甘賓尼做領隊後，戰術風格亦都完全唔同，令人期待明日般尼大戰「般尼頓」嘅打吡。

相關資料：

https://bit.ly/4azFb7h

【球迷會請入】熱刺香港：有力與曼城一戰

https://sports.now.com/home/news/details?id=31438435171

【球迷會請入】日本隊香港球迷會：上田係亞洲盃首席中鋒

https://sports.now.com/home/news/details?id=38866088790

【球迷會請入】「巴」「皇」躉齊貼愛隊贏2：1

https://sports.now.com/home/news/details?id=38860555972

【球迷會請入】般尼從來不易！

https://sports.now.com/home/news/details?id=38858783508