【Now Sports】般尼從來不易，這個你我早已知……是的，就算不是般尼躉都應該聽過，甚至出現在般尼的比賽場刊。這個英冠盟主重返英超後踢來倒是不易，暫列尾三，且聽般尼香港球迷會代表艾雲道出球隊當前問題與願景。
Q可否簡介一下你哋球迷會/群組？
大家好，我哋係般尼香港球迷會Hong Kong Clarets，如果要計正式成立年份係2019年。其實專頁喺2019年之前已經成立，只係去到2019年正式同般尼官方球會登記成為正式香港區球迷會。現時專頁由兩人合作管理，包括香港區球迷會聯絡人嘅我，以及專頁版主Joe。專頁暫時約有350個Followers，而Signal傾計睇波實時Chatting群組活躍嘅成員大約有廿人。
Q同般尼球會有咩聯繫？
般尼官方球會前年開始比較積極將世界各地球迷會聯繫，例如將唔同國家嘅球迷會以文字採訪方式做專題報道，放喺當日賽事場刊入面及刊登喺官方網站上面。我哋香港球迷會當時亦好榮幸受到邀請，當然要把握機會將香港球迷或者「講波佬」提到般尼必定會講嘅金句——「般尼從來不易」發揚光大！嗰時仲擔心外國人電腦排版未必順利出到繁體字，仲不斷喺電郵提醒佢一定要安裝Traditional Chinese Font，最後「般尼從來不易」不負眾望列印喺場刊（2022年5月7日主場對阿士東維拉）之中，而最近亦都代表香港球迷會拍咗一段幾分鐘打氣短片，而短片將喺摩亞球場播放！
Q般尼喺香港嘅球迷未必太多，經營呢個專頁有何困難？
講到專頁經營，兩個版主真係有小小羞愧，投放喺專頁嘅時間相對其他球隊專頁應該比較少，我哋都幾「佛系」去經營個Page，大多數賽事前後會分享一下排陣、部署、半場簡評，以及賽後檢討等，經營上真係唔困難。我哋兩個版主都一致希望暫時球迷會以重質不質量方向為主，凝聚一啲真係欣賞般尼嘅Fans講下波經……我哋都知道香港應該點都會比較小眾……
Q與球迷曾經/未來計劃有何互動？
其實般尼香港球迷會至今未搞過一次正式嘅實體睇波團，但部署緊希望可以喺12月中舉辦第一次，特登揀咗般尼對愛華頓嘅比賽（12月16日），因為群組入面大部份球迷都對戴治領隊情有獨鍾，嗰日可以欣賞到新一代般尼2.0面對般尼1.0嘅比賽，亦都見到戴治領軍進入摩亞球場，真係別具意義！另外喺賽季當中都會幫各球迷代購波衫，以及球會相關精品。
Q球會升班後戰績似乎未如理想，原因何在？
喺上季英冠升班嘅「勝利11人」入面，當中其實有部份球員以外借身份返老家，例如上季球隊神射手泰拿，今季已經被召回修咸頓再轉投德甲利華古遜；而轉會窗期間，般尼一口氣引入13個新球員，比較上季陣容，只有2、3個仍然留喺正選陣中，可以稱得上今季繼續砍掉重練。由季初到依家，新球員都好似冇咩默契，加上要配合甘賓尼嘅控傳打法，好多時失波都係來自本身中後場失誤，所以每一場波都會有種攻唔起、守唔穩嘅感覺。
另外陣中太多年輕球員，缺點係太易心浮氣燥，暫時踢咗8場已經有兩名球員直紅離場，球隊有好幾次領先但被對手扳平後，成隊波已經洩晒氣冇動力再反擊，結果再三失波大敗離場，點樣將逆境輸緊波嗰種挫敗感快速回復過嚟，都係今年球隊一大課題。今季目前暫時要結論，就係防守部份加上球員心態嘅問題比較大。
Q點評價甘賓尼領軍表現？
我諗對於般尼球迷，呢1、2年個衝擊都幾大，球隊由大家睇慣睇熟，無論喺買人、換人、戰術都極其保守嘅戴治足球，突然變成戰術積極進取開放，季季一換就十幾個年輕球員嘅甘賓尼式足球。上季英冠相信冇人可以估計到般尼升到班外，更差小小以破紀錄高分稱霸，所以對球迷嚟講已經係喜出望外。但最危險嘅部份係大家將上季期望帶落今季，有比較就顯得有傷害，始終英超水平同英冠亦有距離，只係上季本應要面對嘅問題延遲咗去到今季先出現。我認為甘賓尼係好有遠見嘅領隊，嘗試用大刀闊斧嘅手法去為球會播種，但呢個結果未必一朝一夕可以浮現，講緊可能係半季甚至一季之後嘅事。
英超季初每一場波都顯然見到會吸收上場嘅教訓，再去變動改變部署，現時積分榜數字上無疑係令人擔心同失望，但對甘賓尼領隊依然有信心，或者需要時間同耐性去證明自己。
Q揀一個今季暫時表現最出色嘅球員。
今季陣中太多新球員，仲要每個好似踢到患得患失咁，自己好難有深印象。如果要選，我會選擇左閘嘅查理泰萊！佢算係陣中一個資深老將，上季因為有年輕左閘球員伊恩馬臣，搞到佢被迫轉打中堅，但效果未如理想，結果上季大部份時間放入雪櫃。直到今季，甘賓尼由頭幾場本來嘅3後衛，最後改變穩陣少少嘅4後衛踢法，加上伊恩馬臣回歸車路士，查理泰萊近呢幾場先再次得到正選機會，不過真係寶刀未老，喺球隊被人詬病嘅防守問題上，有佢穩穩守住左閘顯得更加亮眼（右閘真係放題……），年紀已經係陣中最大，依然配合到左路進攻同防守，實在值得尊敬！
Q護級信心如何？
如無意外，今季應該都要喺降班漩渦奮鬥，信心真係一半半，見到球隊其實每場都不斷進步進化緊，由一開始嗰盤散沙模式逐漸成形，只係睇下今季剩返落嚟嘅時間容唔容許佢變成一股颱風，定係未成形就已經消散，我哋都幾期待見到之後嘅發展，希望其他球迷可以一齊見證。
Q可否推介與你哋友好嘅本地球迷會或群組？
關係比較接近有修咸頓球迷專頁Southamptons' Stories，畢竟般尼陣中有唔少前修頓球員，例如隊長確克、射手積洛迪古斯，甚至上季般尼由修咸頓借用嘅神射手泰拿，希望下季大家可以喺英超賽場再次一決高下。
另外今季最友好一定係愛華頓球迷專頁——拖肥工廠，好多般尼當打嘅名將轉投愛華頓，例如達哥夫斯基同麥尼爾，最大關鍵當然係領隊戴治，到依家我都會不斷關注佢哋嘅近況，亦都期待12月中摩亞球場上，再次同佢哋同場碰頭。
相關文章：
【球迷會請入】國米躉：杜林可能一季入20球
https://news.now.com/home/sports/player?newsId=sp38855185797
【球迷會請入】棒球大聯盟：上屆港隊已不再捱打 【亞運特別篇】
https://news.now.com/home/sports/player?newsId=sp38852821552
【球迷會請入】拿玻里躉：快啲搞搞條防線！
https://news.now.com/home/sports/player?newsId=sp38850680695
【球迷會請入】德友：為重召湯馬士梅拿驚訝
https://sports.now.com/home/news/details?id=38848258625
【球迷會請入】逢隔周五上載。歡迎各球迷會與群組分享你們的故事與活動，不妨到「球十三」fb專頁留言。