古斯度領紅 車路士0：1負維拉

【Now Sports】藍戰士主場鬥維拉一役有古斯度領紅被逐，10人應戰下終於被奧利屈堅斯攻破大門，0:1敗陣收場。

周日車路士主場對阿士東維拉的比賽，車路士有摩西斯卡斯度任正選，伙拍干拿加拉加任防中，安素費蘭迪斯推前一格任進攻中場，支援尼高拉積遜。開波車仔先有摩西斯卡斯度禁區外施放冷箭未能得手，20分鐘輪到維拉甸尼禁區外拉弓，羅拔山齊士撲出。中段雙方互有攻守，先有車路士24分鐘尼高拉積遜禁區射門被救出，30分鐘維搵則有卡殊冷箭無功而還。尾段車仔安素費蘭迪斯和維拉辛尼奧奴錯失入球機會後，兩隊半場打成0:0平手。

下半場初段雙方中場拉踞為主，具威脅埋門欠奉，轉捩點出現在58分鐘，古斯度（Malo Gusto）侵犯對手，球證先判罰黃牌，但VAR推翻判決，最終球證改判古斯度紅牌，車路士10人應戰。面對維拉隨後接二連三的攻勢，少打一人後車仔換入捷維爾加強防守，但那邊廂維拉73分鐘一次突擊機會由奧利屈堅斯埋門得手，順利協助客隊維持1:0勝局至完場，車路士連續3場聯賽不勝。