【Now Sports】常言道創業難，守業更難，拿玻里今季衛冕意甲面臨重大考驗，而歐聯前景又如何？不如問一問拿玻里香港球迷專頁版主Jonathan。
Q可否簡介一下你哋群組？
專頁全名叫Forza Napoli Sempre拿玻里香港球迷專頁，2017年創立。身為版主嘅我開始迷上拿玻里，大概係2013/14年賓尼迪斯年代，後嚟見香港搵唔到同拿玻里有關嘅球迷會/專頁，所以索性自己膽粗粗開一個Fb專頁，希望多啲人可以講下呢隊波以至個城市，同埋可以有多個渠道，接收球會同球員嘅新聞。不過由於個專頁大部份時候都係一個人打理，所以規模好細，不過我哋都開設咗個通訊群組畀大家傾下計，以我觀察，大部份人睇拿玻里都唔算好耐，同我差唔多。
Q有冇同拿玻里球會官方，或者其他意大利球迷群組有聯繫？
以我所知，拿玻里冇好似其他球會咁有官方認可球迷會，加上專頁都係一個人打理，要安排活動其實好困難，所以開始時都係以專頁嘅方向經營。不過成立咗冇幾耐，有其他喺香港嘅意甲專頁/球迷會嘅搞手，邀請我一齊搞踢波活動，可惜疫情之後就冇再聯絡，版主仲要搬咗去英國住，希望有心人可以幫手喺香港搞下活動啦！
Q強敵環伺，今季衛冕意甲最關鍵係咩？
上年奪冠前嘅拿玻里，穩定度不足一直係最後衝冠失敗嘅主要原因，不過上季其他前列隊對中下游隊都失咗唔少分，反而拿玻里就一直保持穩定水準。如果今季要衛冕，起碼新教練魯迪加西亞要識用隊波嘅人。當然今年後防買人策略失敗，球會同教練要快啲搞搞條防線。
Q拿玻里今屆歐聯分組賽旗開得勝，對今屆前景有咩睇法？
上屆隊波能夠殺入8強的確唔容易，今季照計出線機會都唔細。不過換教練加上後防嘅金玟哉離隊，以依家後防表現肯定應付唔到其他強隊，我估隊波最遠去到16強。
Q除了球王馬勒當拿，如果要揀拿玻里歷來最具代表球員，會係邊3個？
我年資比較短，即刻諗到兩位——卡雲尼、咸錫，第3位冇理由唔包去季奪冠成員，就揀隊長迪羅蘭素啦！故事勵志之餘又好鍾意球會。
Q球迷會未來有咩計劃同活動？
如果有人幫手搞下睇波，或者買波衫團應該唔錯！
Q 可否推介一個同你哋友好嘅本地球迷會/群組？
意甲大本營，之前成日tag我哋個page：多謝你哋！
相關文章：
【球迷會請入】德友：為重召湯馬士梅拿驚訝
https://sports.now.com/home/news/details?id=38848258625
【球迷會請入】逢隔周五上載。歡迎各球迷會與群組分享你們的故事與活動，不妨到「球十三」fb專頁留言。