【Now Sports】從去季重奪意甲,到今季勇闖歐聯4強,AC米蘭再顯勁旅本色,成立超過20年的香港AC米蘭球迷會代表揚言,只要愛隊晉身歐聯決賽,必大搞睇波活動,又表示深盼愛隊再度訪港,但不必再唱happy birthday to me~~~
Q:可否簡介一下你哋球迷會?
喺朋友之間搵一個鐘意英超的朋友係好容易,但如果係搵喜歡意甲嘅朋友就真係好難得。成立於2001年的香港AC米蘭球迷會,目的就係為香港鍾意AC米蘭、甚至鍾情意甲嘅朋友,提供一齊傾波、一齊支持愛隊嘅地方。由於當年未興起社交媒體,我哋球迷會網站嘅米蘭論壇就令到我哋呢一班人開始聚集起來。廿年嚟有超過200名會員,我哋搞過好多活動,除咗好多次睇波活動外,我哋仲有一齊組團去北京鳥巢睇意大利超級盃米蘭打吡,仲有幾次返內地睇國際冠軍盃等。
但要講到最深刻體會,當然係2005年同埋2007年兩屆歐聯決賽睇波活動。眾所周知,2005年我哋由半場時天堂,完場時跌咗落地獄。好彩只係短短兩年後,似係整定咁又係對返利物浦(贏2:1),記得當時出嚟睇波嘅米蘭兄弟姐妹完場後都好似釋懷咁,甚至有幾個喊埋出嚟。
呢廿年嚟球迷會都有好多唔同年齡層嘅球迷加入,由喜歡巴里斯、馬甸尼、巴治奧、荷蘭三劍俠嘅,到舒夫真高、恩沙基、卡卡年代、甚至細哨、碧咸開始低潮期時加入嘅球迷都有,米蘭喺香港佔意甲球迷嘅數目,應該都係數一數二。
Q:咁多年,點維繫同球迷會成員嘅關係?
由於香港意甲球迷相對唔多,做得我哋米蘭球迷好多都係好死忠。呢廿年真係高山低谷大家都一齊走過,大家都好團結,每場比場無論幾點,都好多球迷一齊喺社交媒體同群組Live chat。即使好多年都冇冠軍,當我哋一舉辦活動時,球迷都好踴躍好熱情,真係令人好感動。
Q:AC米蘭對上次訪港係2004年,當年你哋有搞睇波團,可唔可以形容下當日情況?
2004年係我哋香港米蘭球迷見到馬甸尼、舒夫真高等嘅時候,真係尖叫咗出嚟,真係超級興奮。雖然當年球迷會成立日子唔長,我哋都組織咗超過100人嘅睇波打氣團,到大球場一齊大叫“FORZA MILAN”、“TIAMO SHEVA”(舒夫真高我愛你),仲有大家喺米蘭下榻嘅酒店追星影相簽名真係好難忘,真係好希望米蘭快啲再訪港,但就唔好再上電視台(當年岩布仙尼)唱生日歌啦。
Q:好多人話AC米蘭三劍俠之後,最強係2002至2007年嘅「黃金年代」。隊波去季重奪意甲,今季又殺入歐聯4強,如果將目前隊波同「黃金年代」比較,有咩睇法?
真係好難比較,以往無論歐聯或意甲冠軍,都係由一班冠軍級球員拎到,而上季我哋係依靠星級老將,即係伊巴謙莫域同埋基奧特等以老帶新,帶住班年輕人衝擊冠軍。上季意甲冠軍可以話廿年來最驚喜一次,講人腳真係及唔上國際米蘭同祖雲達斯,都係依靠上下一心,球員用夢想同努力,再加埋有啲幸運先拎得到。上季意甲冠軍亦直接成就咗呢班年輕球員,令到佢哋更加有自信,咁先令到今季可以進步到殺入歐聯4強。
Q:歐聯米蘭打吡在即,勝負關鍵會喺邊度?
關鍵係左路同埋歐聯D.N.A.!我哋左路嘅里奧、菲奧靴蘭迪斯組合可能擁有歐洲數一數二嘅速度同突破能力,如果佢哋有狀態有發揮,我夠膽講係毫無破綻!歐聯D.N.A.係真有其事嘅,植根咗喺每一代米蘭球員嘅心入面,當去到關鍵時候就會畀到信心隊波,有時歷史底蘊真係幫到球隊㗎。
Q:如果揀球隊本季最出色嘅一名球員,會揀邊個?
彷彿成日微笑嘅里奧,係陣中最有潛力去到世界頂級嘅球員,佢嘅表現亦直接影響到隊波成功與否,歐聯8強對拿玻里有兩個助攻,真係超級關鍵。
Q:球迷會嚟緊有咩活動?
如果入到歐聯決賽,就一定大搞決賽睇波活動,我哋亦有球迷會足球隊,定期約戰唔同嘅球迷會聯誼一下。另外我哋亦籌備緊下季組團一齊去米蘭睇波。
Q:可否推介一個同你哋友好嘅本地球迷會/群組?
香港帕爾馬海外球迷會,好希望帕爾馬快啲升返上意甲,期待意甲七雄再重聚。
相關文章:
【球迷會請入】賓福特香港球迷會:贏曼聯4:0收穫大
https://sports.now.com/home/news/details?id=38403816700
【球迷會請入】香港多蒙特球迷:平常心睇爭霸
https://sports.now.com/home/news/details?id=38357300105
【球迷會請入】「我可能係香港唯一布力般球迷……」
https://sports.now.com/home/news/details?id=38300493733
【球迷會請入】逢周五上載
各球迷會與群組,若想分享你們的故事與活動,不妨電郵:
ballthirteen@hotmail.com
星期一 【足二代】
星期二 【體壇歪人】
星期三 【英超知音人】/【蹴吧!日韓】
星期四 【女足豪傑】
星期五 【球迷會請入】