【Now Sports】去年夏天加盟史篤城的香港女子足球員陳頌文（Karri），近期已轉為半職業，距離圓全職足球夢又踏前一步。談到有甚麼與香港女足球員共勉時，她說：「唔好放棄，如果鍾意踢，就要堅持。」
撰文：張仲碩
陳頌文兩年前隨家人移居英國，去年由曼城U19改投史篤城女足，代表球隊參加英格蘭國家第三級聯賽預備組賽事，一直廣受注視，Karri日前接受sports.now.com獨家視像訪問時透露一個喜訊：「我都係幾個禮拜前收到通知，因為球會多撥資源，依家我已經係半職業球員，目標係成為全職球員，參加女子英超（WSL）。」被問到可有為全職之路訂下時間表，小妮子笑言：「暫時未有特定時間表，唔肯定，依家只係想提升表現。」
在剛過去周日的預備組聯賽，在客場穿起招牌11號（生日冧巴）球衣的Karri梅開二度，司職中場的她迄今已在各項賽事攻入9球，而在預備組射手榜暫列第18位，以加盟首季的球員而言甚為亮麗。
18歲的Karri當年為賽馬會體藝中學贏得學界冠軍，亦曾協助公民重奪女子甲組聯賽錦標，離港前已經越級以「大港腳」身份出戰A級國際賽。她道出兩地足球水平差異：「以前已經參與香港最高水平比賽，但同呢度水平唔同，我依家踢嘅預備組，水平已等同香港最高水平。」
約兩個月前，史篤城在球會twitter發放，Karri在一場閉門友賽離門逾25碼抽射球門上角破網的片段，惟談到加盟至今的代表作，Karri還是首選獲提升為「一隊」的處子戰，那是去年11月在挑戰盃次圈大勝尼克鎮預備組隊10:0，她後備上陣頂入一球。「開始時好緊張，始終預備組同一隊嘅水平好唔同，我覺得做到自己鍾意做嘅嘢，踢落冇乜怯場。第一次代表一隊同入到波，所以印象特別深刻。」史篤城最終摘下該項賽事桂冠，即Karri在奪冠過程出了一分力。
除了踢球，Karri同時在愛華頓足球學校修讀體育文憑，校方派3名學員參與選拔英格蘭北部明星隊，僅Karri入選，並在去年底出戰南部明星隊，結果她在尾段與隊友「One-two」後射入埋齋，助北部明星隊湊成8:4大捷。
Karri追夢之路當非一直平坦，苦頭難免，回想初到英國所遇到的挑戰不少：「喺香港當然有學好英文，不過最初覺得呢度嘅人英文講得好快，有時好難明。經過兩年，依家聽人講英文已經比較容易。」撇開語言，最大挑戰莫過於身型輸蝕。在港時，Karri往往是隊中最高，人在英倫卻是較矮小的一個，縱然她表示「以技術及速度取勝」，但還是非「惡補」不可。
「會做多啲令自己大隻啲嘅體能訓練，去多啲Gym，令自己可以踢足90分鐘，盡量踢耐啲同維持狀態，唔好咁易受傷。」積極鍛鍊體能之餘，她不得不作出犧牲，戒除吃零食與飲汽水。
Karri訓練日程緊密，幾乎每天都與足球為伍，且花很長時間在交通上。「史篤城逢星期二、四訓練，星期日比賽。當訓練嗰日，我朝早8點起身，揸車大約1個鐘頭到學校，下晝3點或3點半放學，需要駕駛大約1個半鐘頭到史篤城；校隊逢周一至五訓練，星期三比賽，而我逢星期一亦會自己做體能訓練。」
既要讀書又要踢球自是不易分配作息時間，可幸當地功課壓力相對較香港為細：「我哋學校係冇考試，喺功課度攞分，功課係將學到嘅嘢寫返出嚟，而一份功課畀你2、3個禮拜交，所以唔係特別難。」
在異邦發展順利，被問到有甚麼人想感謝時，她二話不說最感激家人：「首先係屋企人，佢哋畀好多支持我，無論喺香港同呢度都係。爸爸同媽咪好支持我，爸爸之前逐間球會e-mail去問有冇trial，加入史篤城都係佢帶我去選拔。佢哋車出車入，有時練到好夜，佢哋都會等我返嚟。」
「球會練波係唔畀人睇，所以佢哋去到球場都係喺出面坐喺架車度等，無論我練個半鐘或者兩個鐘，都等足咁耐。」Karri把家人放在首位，很珍惜放假時陪伴家人，說到弟弟甜笑嫣然：「我有兩個弟弟，每逢星期六放假，最鍾意揸車帶佢哋去公園玩，一齊放狗。」家人以外，她感激當地教練讓她加入球隊，甚至提升到一隊作賽。
掛念香港嗎？「掛住我啲朋友，掛住冇過嚟嘅親人，遇到困難亦會搵朋友傾訴，香港同英國有時差，我同佢哋唔容易成日傾，但有時都會Face Time傾計。」Karri在史篤城不愁寂寞，因為另一港將林裕殷（Natalie）早前亦加盟史篤城，兩人在賽場上並肩作戰，互相扶持。Karri說：「佢啲英文比我流利，有時當我訓練有嘢聽唔明都會問佢。」
在香港踢女子足球的道路從不易走，既非職業亦無專業配套，為現實埋沒天份者不計其數，被問到有甚麼話鼓勵在香港追夢的女足球員時，她說：「我想講嘅係，唔好放棄，因為喺香港踢波比較難，大家都為興趣而踢，唔係職業。如果鍾意踢，就要堅持。」
Karri視曼城中場迪布尼為偶像，希望踢出像該名比利時球星一樣的風格，交出致命傳送及創造機會。至於女子球員，她最欣賞是效力阿仙奴的英格蘭代表隊隊長莉婭威廉臣，曾現場看過後者比賽。
陳頌文（Karri）
年齡：18
司職：中場
現效力球會：史篤城
曾效力球會：公民、曼城U19
相關文章：
史篤城女隊：Karri係亞洲球員模範
https://sports.now.com/home/news/details?id=38428678467
