【Now Sports】世界盃是體壇盛事,全球參與其中,每屆都有非球迷「入坑」,究竟點睇最開心?最易入局?等陳子豐同大家分享一下世盃「新手入門」!
談到世盃新手,最經典、最多人講的例子當然是「如何跟女友解釋越位」!我與陳太每次看比賽前都要好好解釋一下賽場規則,越位自然要再三講,其他規矩都要講到明。記得有一次忘了講就開波,女友自然每事問,一開始還有心機仔細回答,答多幾條之後耐性用完開始黑面,結果當然就是激嬲女友!當時睇波就好享受,之後幾日就夠晒難受,所以奉勸大家要照顧好一眾世盃新手!
不過要調教一個新球迷,最重要當然不是球例,而是向他們展現足球美好之處。與籃球不同,足球要得分入波並不容易,籃球每十多秒已可以入波再攻守互換,反而令比賽更似文鬥。4節比賽頭3節你來我往,實力不太懸殊的話其實比賽進程大同小異,往往鬥到第4節才出真功夫。足球情況有點不同,因為入球不容易,每分每秒都有機會成為關鍵,不小心分神隨時錯過精彩一刻。在現場看比賽感覺更深刻,因為沒有重播更易看漏!看到補時就更緊張,因為一個入球隨時奠定勝負;盃賽「兩個只能活一個」的賽制就更令人肉緊,加時、12碼大戰,每一秒都有事發生,每一秒都可以左右賽果,就是這種突變扣人心弦。
要感受足球賽事的美麗並非一場半場可以做到,要進一步速成的話就要有「寄託」!第一次參與世盃,最好由球員入手,揀一個心水球員追看。你貪佢靚仔又得,追逐名氣亦無所謂,或可追看最後一屆參與的球員。與支持的球員一起體驗賽事,想像自己與他同步,細味每場比賽的點滴,自然能更投入,更易感受氣氛!個人建議今屆可以追看英格蘭的比寧咸,他在球會多蒙特表現極為亮眼,而且創造能力強,現在三獅軍團的創造力仍有不足,不妨看看比寧咸可以為國家隊帶來甚麼。另外霍頓、安巴比同樣值得捧場,因為每個都獨當一面,值得追看!當然亦可以選球王來當新手入門,美斯C朗不會令你失望!
陳子豐簡介
演員、藝人兼主持,曾參演《大叔的愛》、《季前賽》等劇集,亦以旅遊節目主持身份遊歷不少國家。支持愛隊曼城的資歷長達廿年!