【Now Sports】二十年前，中國首次，也是目前唯一一次出戰決賽周歷歷在目，本身也愛睇足球的香港女子乒乓球隊主教練李靜，難忘當年那一隊國足。
「一諗起世界盃梗係足球、開心，一個全球盛大賽事，睇世界盃一定開心同刺激。」曾以球員及教練身份為香港贏得奧運獎牌的李靜，睇世界盃的閱歷甚豐。「我係由1986年開始睇，記得馬勒當拿當年好勁，特別係對英格蘭出『上帝之手』，同埋過關斬將入波，好正！」他又難忘2014德國對巴西：「我同朋友一齊睇，諗唔到德國贏7:1。德國團隊精神好勁，證明足球係團隊努力嘅運動，並唔係好似以前咁靠一個球星。全世界發展都係講求合作。」
被問到今屆支持奪標心水時，他說：「南美洲我支持巴西同埋阿根廷，歐洲就睇好比利時。法國我唔睇好，因為安巴比太獨食，唔識合作，唔可以一個人玩晒，隊波雖然強都唔睇好。如果真係只揀一隊就巴西，因為隊波氣勢上緊嚟，今屆輪都輪到佢哋攞冠軍。2014年嗰屆尼馬受傷，隔咗幾年，佢哋想攞世界盃嘅決心會好強烈。巴西運氣應該比阿根廷好少少，美斯係強，但要講好唔好彩，要講大賽命，有啲人再叻都冇，我認為尼馬會好運啲，神射手都睇好佢，佢傳得射得，只要隊友肯朝冠軍目標，多傳波畀佢，相信佢有機會。總之巴西一掃以前懶散，將花式同個人技術融入整體戰術，同埋加入歐洲長傳，一腳波，實在咗。」
李靜也難忘國足於2002年日韓世界盃殺入決賽周：「最精彩係中國對巴西，雖然中國輸4球，但都有機會入波，只係門前把握時假動作做得唔夠，老實得滯！當時中國足球氣氛好好，整體配合好，感覺比依家嘅更流暢，希望自己國家足球會好番啲，要虛心學習。」
「嗰屆睇到韓國嘅拼勁，唔好理咩成績同有冇黑哨，睇到人哋場上嗰種拼勁，我覺得國足球員都可以做到。仲有要講個人修為，體育人都專業，雖然收入唔同但體育理念一樣，唔可以做到咁快咁強咁高，起碼要做到一個最好嘅自己，對自己同大眾有交代。」
「2002年嗰班國足球員，印象中都幾搏命，類似馬明宇、邵佳一等等配合有紋有路，同依家唔同。起碼盡咗力唔夠踢，大家都接受到，體育有贏有輸。只能期待中國足球好少少，不過唔敢奢望。」他續說。
相關文章：
【一生一世盃】阿仙奴球迷女神佩芝：南美稱霸
https://sports.now.com/home/wc2022/news/details?id=37343256503
【一生一世盃】幕後英雌：今屆大不同
https://sports.now.com/home/wc2022/news/details?id=37310322448
【一生一世盃】足球小女將最愛簡尼
https://news.now.com/home/sports/player?newsId=sp37300952330
【一生一世盃】新丁KK眼中三大美男
https://sports.now.com/home/wc2022/news/details?id=37269461628
【一生一世盃】田雞：同星爺睇完波拍《少林足球》
https://sports.now.com/home/news/details?id=37268491720
【一生一世盃】資深體記：現場睇法國圍揪巴西
https://sports.now.com/home/news/details?id=37256536010
【一生一世盃】大佬孝：諗過剪河童頭
https://sports.now.com/home/news/details?id=37218976745
【一生一世盃】集圖發燒友的摯愛
https://sports.now.com/home/news/details?id=37212954906
【一生一世盃】英格蘭，還是撐 / 唱下去
https://sports.now.com/home/news/details?id=37212954904
【一生一世盃】，睇波回憶，當然可以係一生一世，本欄由筆者或被訪者分享這個大賽嘅睇波難忘經歷，或對今屆賽事嘅睇法。