【Now Sports】Now TV靚女主持，亦是阿仙奴球迷心目中的女神李佩芝（佩芝），最難忘的世界盃球星是阿歷斯山齊士，又認為今屆賽事屬於南美洲球隊的天下。
「一諗到世界盃，就聯想到大力神盃，因為係全金色，覺得好靚、好重，加上世界盃係好多球員夢寐以求想贏嘅盃賽，為自己國家爭光，四年一次，球員一定要把握機會。」佩芝覺得世界盃意識重大：「因為就代表我又老咗四年啦！」
佩芝是2014年巴西世界盃開始投入這個大賽，最難忘球星是智利的阿歷斯山齊士：「都算係佢令我鐘意足球，或者更深入去了解足球，嗰年佢加盟阿仙奴，亦係我開始鍾意阿仙奴嘅一年。」
被問到有何世界盃一世難忘的回憶時，她說：「又冇講到一世回憶咁深刻，但始終世界盃係全城，甚至全球狂熱嘅賽事，所以好多女球迷都會同我一齊睇足球，平時比賽或者都係多同男仔睇，當女仔都一齊討論邊個球星靚仔啲，又或者佢哋會問我相關嘅知識，感覺好似識足球多佢哋少少，有份優越感。」
她的冠軍與神射手心水都屬於南美：「因為卡塔爾都係比較熱嘅地方，南美洲球隊應該會較著數，支持嘅當然要講巴西，加比爾捷西斯呢位阿仙奴球員能夠入選巴西大軍名單。本身巴西已經係陣容鼎盛，好多人可選擇，係幸福嘅煩惱。另外都會留意睇敵對嘅阿根廷有冇機會攞冠軍，因為美斯真係差一個世界盃冠軍。2014我第一次睇正正係佢飲恨（阿根廷決賽負德國）。」
「既然我支持南美洲球隊贏，會走到較後階段，入波數量會較多，神射手我揀兩個，其中一個大路啲就係美斯，因為仍喺法甲狀態唔錯，助攻都入球能力都喺度，見到佢寶刀未老，相信阿根廷會繼續倚重佢；另一位係巴西嘅雲尼素斯，佢喺皇家馬德里表現非常好，雖然佢踢左翼，但相信同前線配合應該會做到唔少攻勢甚至入波，加上佢由一位個人主義，變為團隊整體意識強嘅球員，進步好大。」
身為阿仙奴躉，決賽周自然也睇好兵工廠球員有好表現。「會特別睇好法國的沙利巴，華拉尼有傷，相信法國都需要沙利巴呢種類型，始終佢路數唔錯，亦有身型，佢速度上唔算快，但意識上OK，希望佢可以大放異采。」
世界盃期間既要工作又要睇波，能否全情享受睇波樂趣？「依家仲係學習過程當中，不嬲覺得做呢份工係有好大好處，因為自己真係好鍾意足球，每一場波都有新鮮同刺激場面，所以每一場都可以享受。」決賽周大部份時間將與NowTV評述員一起觀戰，對佩芝而言是夢寐以求：「估唔到真係可以坐咁近去聽佢哋解說，呢個係我最想亦將會做到嘅事。」
女球迷總愛睇靚仔球星，佩芝透露心目中的決賽周三大美男：「我揀三個類型有少少唔同，其中兩個有私心都係嚟自阿仙奴，其中一個係沙列巴，個人鍾意man啲，黑黑實實嘅球員，感覺上好似大隻啲、strong啲有佬味，雖然佢年紀仲細過我。」
「第二個係Ben White（賓韋治），佢喺場外嘅衣著風格都幾型，加上成日配搭好靚嘅accessories，成個壞男孩感覺，幾charm。最後一位嚟自巴塞隆拿嘅加維，係西班牙年輕小鮮肉，相信佢都係香港女球迷心目中其中靚仔人選。」
下期預告：
15/11 香港乒乓球名將李靜回望國足踢世盃
相關文章：
【一生一世盃】幕後英雌：今屆大不同
https://sports.now.com/home/wc2022/news/details?id=37310322448
【一生一世盃】足球小女將最愛簡尼
https://news.now.com/home/sports/player?newsId=sp37300952330
【一生一世盃】新丁KK眼中三大美男
https://sports.now.com/home/wc2022/news/details?id=37269461628
【一生一世盃】田雞：同星爺睇完波拍《少林足球》
https://sports.now.com/home/news/details?id=37268491720
【一生一世盃】資深體記：現場睇法國圍揪巴西
https://sports.now.com/home/news/details?id=37256536010
【一生一世盃】大佬孝：諗過剪河童頭
https://sports.now.com/home/news/details?id=37218976745
【一生一世盃】集圖發燒友的摯愛
https://sports.now.com/home/news/details?id=37212954906
【一生一世盃】英格蘭，還是撐 / 唱下去
https://sports.now.com/home/news/details?id=37212954904
【一生一世盃】，睇波回憶，當然可以係一生一世，本欄由筆者或被訪者分享這個大賽嘅睇波難忘經歷，或對今屆賽事嘅睇法。
