【Now Sports】基斯坦奴朗拿度上月中post咗一張同朋友影嘅相,直到上星期,加拿大籍著名臨床心理學家Dr. Jordan Peterson上咗Piers Morgan嘅清談節目,先知道原來相中係佢,係佢去英國探C朗時影。呢次傾下偈,竟然就惹來C朗患上抑鬱症嘅揣測……
撰文:June
由於英超開季後,基斯坦奴朗拿度(Cristiano Ronaldo)只係入咗1球,而佢喺國家隊嘅表現都備受批評,《馬卡報》直指C朗見臨床心理學家係患上抑鬱症,但Dr. Peterson其實從來冇公開講過呢件事,而職業守則亦唔容許佢咁做(除非C朗同意)。咁Dr. Peterson講咗啲咩呢?
Dr. Peterson表示,由於C朗幾個月前經歷咗一啲困難(相信係嬰兒夭折加上轉會傳聞),C朗嘅朋友畀咗Dr. Peterson嘅片佢睇。C朗覺得好有啟發性,睇埋呢位臨床心理學家其中一本著作之後,就決定邀請Dr. Peterson去佢喺曼徹斯特嘅屋企。
相信有睇過我上季關於皇馬逆轉心理學文章嘅讀者都知道,其實心理學嘅範疇好大,而見臨床心理學家唔一定係因為有情緒病/心理問題;好多人想提升自己嘅表現/心理狀態,學習面對壓力或者計劃未來時,都會搵臨床心理學家,喺外國其實都好流行。
Dr. Peterson喺節目透露:「C朗畀我睇下令佢保持最好狀態嘅健身器械,傾下佢嘅公司。不過大部份時間,我哋係傾佢對將來嘅想法,同埋佢喺追求呢啲想法過程入面遇到嘅障礙。其實係一個策略會談。」
相信C朗真係經歷緊一個低谷,但C朗嘅球迷應該知道,C朗一向好正面同積極,亦係一個心理好強大嘅球員。當然佢唔係鐵造,都有失意同軟弱嘅時候。所以我作為一個臨床心理學家,都好欣賞佢願意搵專業人士傾吓佢面對緊嘅困難。特別係世界盃就到,更加希望佢可以提升返表現同心理狀態。其實2015年球季起,每年C朗開季其實都會有佢入球荒嘅傳聞(只要喺google 打Goal Drought Ronaldo加年份就會見到),但當聖誕新年後C朗又會成個人著咗火咁入番波。
其實就算係抑鬱症,都係一種常見情緒病,根據《香港精神健康調查2010-2013》,年齡介乎16至75歲嘅香港華裔人口中,約有3%曾經受抑鬱症困擾,正所謂病向淺中醫,有困難就及早搵人傾,同時要照顧好自己,唔好自己一個人撐。
下星期一10月10日就係世界精神健康日,又稱世界精神衛生日(World Mental Health Day),世界衛生組織希望藉此機會提升大眾對精神健康嘅認識,同埋希望大家向身邊有需要嘅人伸出援手,或者叫佢盡快向專業人士求助,就好似C朗嘅朋友咁。
另外,香港精神健康諮詢委員會亦為公眾提供一個情緒危機分享平台「陪我講Shall we talk」,分享關於精神健康嘅資訊。有興趣不妨去睇吓。https://www.shallwetalk.hk/zh/
祝大家身體健康。
相關文章:
【鏟草男女】皇馬逆轉心理學(一)
https://sports.now.com/home/news/details?id=36133178367
【鏟草男女】皇馬逆轉心理學(二)皇者之心
https://sports.now.com/home/news/details?id=36222927080
【鏟草男女】皇馬逆轉心理學(三)喚醒昂揚鬥志
https://sports.now.com/mobileweb/news/details?id=36315371787
撰文:June
旅皇迷一名。喜歡旅行,喜歡足球;享受在場邊搖旗吶喊,經歷足球的喜怒哀樂。
歡迎瀏覽球十三fb專頁若得到波友一個like就是我們團隊的一大鼓舞:
www.facebook.com/ballthirteen