【Now Sports】皇家馬德里成功奪得歐洲超級盃，教練安察洛堤賽前訪問時話今年會努力為6個冠軍而戰，結果皇馬先下一城，其餘5冠當然有難度。除咗未有賓斯馬後備人選外，相信有一個老問題，球迷今季會再講千萬次——永續KCM？
撰文：June
早排安察洛堤笑稱KCM（卻奧斯、卡斯米路、摩迪）為百慕達三角，即足球喺佢哋中間會好似啲航機同船喺百慕達三角消失一樣。嘩！講到咁厲害……而歐聯決賽，安察洛堤的確靠KCM 令大家大跌眼鏡！
我認同當佢哋哋休息得夠時，係可以好似5月份歐聯決賽咁發揮得好好，不過成季咁長咁多戰線，真係永遠用KCM？而中場接班人唔係冇，上季卡馬雲加都有唔少上陣機會，但卡馬雲加年輕，防守方面都有唔少驚險場面，需要好好磨練。而皇馬今季引入防中祖亞曼尼，希望都會對輪換有幫助。
超級盃再見到安察洛堤中場正選放KCM，可見佢依然喺重要比賽最信任呢三位中場；三位發揮正常，係摩迪有幾下俾人迫搶甩波，但問題不大，卡斯米路更獲選為全場最佳球員。到70幾分鐘，卡馬雲加入替，相信係安察洛堤知道呢個19歲中場接班人之一仲係質新，需要更多上場時間吸取實戰經驗。今季希望安察洛堤用KCM 還用KCM，都要顧及佢哋會攰，一攰就跌watt 得非常明顯。個人期望安察洛堤可以做到中場新舊交替，完成中場換班呢個歷史任務（卻奧斯暫時冇同皇馬傾續約）。
陣容方面，後防夠人但安察洛堤應該要再試一試陣，因為左閘只得文迪，而相信皇馬未必會再加添球員。賓斯馬嘅中鋒位置冇後備球員會係一個隱憂，夏沙特係咪可以踢到假9位置，佢會唔會容易受傷，真係一堆問號……但相信安察洛堤有能力解決。
皇馬開季迎來首冠，返屋企時媽媽竟然恭喜我，哈哈，對足球冇興趣嘅佢都開始識得皇馬，心入面有啲興奮，感染到其他人係一件開心事。希望皇馬今年繼續有贏波嘅新聞吸引到佢注意，進一步認識皇馬。因為身邊有一班欣賞同一間球會嘅人係好開心嘅事，亦係我搞球迷會嘅原因。借位賣個廣告，皇家馬德里香港官方球迷會 2022/23年度會員招募已經開始，有興趣加入同我哋傾偈睇波踢波嘅皇迷，可以參考呢個網址：https://realmadridhkfc.org/members/apply/ ，期待大家一齊參與活動，支持皇馬！
撰文：June
旅皇迷一名。喜歡旅行，喜歡足球；享受在場邊搖旗吶喊，經歷足球的喜怒哀樂。
歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen