曼聯開季第一戰已碰釘。
(©AFP)
【Now Sports】曼聯本季英超首戰即落筆打三更，主場以1:2不敵白禮頓，全失3分。
周日曼聯對白禮頓的比賽，是紅魔新領隊坦夏首度領軍戰英超外，另一焦點落在今夏盛傳離隊的基斯坦奴朗拿度身上，今戰他先列後備，由新加盟的基斯甸艾歷臣任箭頭，另一新兵利辛度馬天尼斯亦正選上陣。
一開波作客的白禮頓即反客為主，達洛治解圍被托沙攔截成功，後者左路一推抽射網側出界。6分鐘輪到曼聯有黃金機會，般奴費蘭迪斯14碼點無人看管下接應右路傳送埋門，但一射炒高。白禮頓其後有托沙埋門被費特擋出，那邊廂曼聯亦有艾歷臣把握快攻左路射門不中目標。
30分鐘入球出現，白禮頓中路搶波後直線交予韋碧克，後者左路傳送至遠柱的哥斯篤入，白禮頓作客領先1:0。正所謂一不離二，9分鐘後白禮頓快攻，輾轉間落在馬治腳下右路燙射，迪基亞撲出不遠，哥斯執死雞梅開二度，白禮頓半場領先2:0返更衣室。
下半場一開波曼聯主動壓上前進攻，先有華舒福初段左路窄角度施射不中目標，其後曼聯53分鐘換入C朗加強攻力，63分鐘達洛治傳中，遠柱華舒福抽射高出，3分鐘後艾歷臣遠射又被擋出。不過隨後角球攻勢，達洛治在門前混亂下逼使麥卡里士打烏龍，68分鐘追成1:2。尾段曼聯再換入雲迪比，86分鐘C朗小禁區抽射被擋出後，白禮頓成功保持勝局，歷來首次在英超作客擊敗曼聯。