【Now Sports】利物浦投資蘇格蘭神奇小子奇雲藍斯,有望為阿歷山大阿奴搵接班人!究竟佢有幾勁先?
文:薄荷糖
18歲嘅奇雲藍斯(Calvin Ramsay)年紀輕輕已經打響名堂,至今已為鴨巴甸上陣40場,深得球會信賴,亦可見實力超晒班!更有傳媒將他比喻為阿奴第二,大家應該都估到佢咩料啦:單單係2021/22年球季,上陣33次已攻入1球,助攻9次,同阿奴一樣攻守兼備,係現今足球最為吃香嘅球員類型,難怪利物浦肯豪使400萬鎊將佢帶到晏菲路,仲有額外條款隨時要畀多150萬鎊鴨巴甸。
睇埋當地英媒嘅「球探報告」,就可以更深入認識呢個神奇小子:「奇雲藍斯傳球非常出色,而且涵蓋不同距離,是一個強大的校炮手。他傾向挑戰對手守衛,給人翼鋒的印象更多於右閘。」
如此出色球員,當然吸引不少球會青睞,有傳曼聯、紐卡素、熱刺、李斯特城以至列斯聯都對佢有意,不過笑到最後係英超冠軍熱門之一嘅利物浦。加上有阿奴做師傅傳授一身好功夫,呢名藍斯有望成為紅軍潛力新股!