0
0
【鏟草男女】皇馬逆轉心理學(二)皇者之心

【鏟草男女】皇馬逆轉心理學(二)皇者之心

【鏟草男女】皇馬逆轉心理學(二)皇者之心

【Now Sports】上次提出,皇家馬德里逆轉係因為有強大嘅心理堅韌力(mental toughness)。另一個原因,係因為佢哋試過,見證過逆轉係可以嘅!2014年,安察洛堤麾下出戰歐聯決賽,沙治奧拉莫斯嘅逆轉頭槌係一時佳話,之後拉莫斯一次又一次絕殺同追和,成為關鍵先生/拉莫斯時間。今季嘅皇馬再喺安察洛堤揮麾下,球隊亦特別多呢個情況,其實唔係偶然,因為佢都有一顆皇者之心──就係信心(confidence)。

撰文:June

皇者之心,就係信心(confidence)。

信心喺心理堅韌力方面有重要作用,而缺乏信心就係引致比賽焦慮嘅一個重要因素。

歌手黎明有句金句: 「要贏人,先要贏自己」。到底要贏邊個自己? 原來好多時阻住我哋嘅唔係「自己」,而係「認為自己唔得」嘅自己。(係咪好黎明呢?) 簡單啲,就係唔能夠相信自己可以做到嘅呢個概念拖累。例如:練習咗幾次就同自己講,我冇可能跑到10公里。

自信係最終衡量大家有幾多信念堅持到底嘅指標,同皇馬精神:Hasta el final,直到最後,不謀而合。如果你都唔相信自己,你已經冇心理堅韌力去堅持到底。

有較高自信人士會認知到障礙係生活一部份,並從容應對。 但無咩自信嘅人可能會認為世界同佢地作對,感到被打敗,或者覺得係外力令自己無法達成目標。

無數賽後訪問入面,皇馬球員或領隊敗陣時,都係講自己或球隊要點面對,極少會見到球員賴人哋令自己失敗嘅畫面;而成功時,佢哋會讚球隊嘅付出,並將目標放眼更遠。

自信亦有利於其他近似嘅自我調節概念,如:保持積極及保持相信自己。 自信嘅運動員更容易相信自己,更坦然直接面對挑戰。當然,過於自信都存在風險。 如太過自信會導致自己承擔太多、對人對自己都唔寬容,同埋睇唔到自己可以進步嘅空間。

皇馬有冇運動心理學家?

正常嚟講,運動心理學家會幫球員喺心理上做以上建設。但以我所知,皇馬直到上季都無一位運動心理學家喺教練團隊(皇馬青訓體系反而有),所以相信安帥今次回歸,喺心理質素呢方面都花咗唔少工夫。以巴西兩名小將做例子:

雲尼素斯同賓斯馬嘅提升

上一季射門有好多失誤。今季雲尼素斯同賓斯馬開始夾得穩定,西甲入咗17球。大家都讚佢開竅,信心提升,其實係安察洛堤嘅安排。古圖奧斯有次訪問指,好開心安帥將佢同其他安帥合作過嘅龍門比較,特別係當安帥叫佢畀啲進攻球員入吓波,佢覺得能力被認可。

Transfermartket 用雲尼上年同今年嘅數據做對比,同樣49場比賽,雲尼攻入18球(未計後來對利雲特入3球戴帽),交出19次助攻,上季只有6球及7助攻。可見雲尼同佢助攻嘅隊友進步唔少,將機會轉化為入球。

安察洛堤叫古圖鬆手少少,呢個做法其實一石二鳥。一來可以提升球員嘅射門信心,因為佢地唔係無能力,但無成功機會所以無自信;而事實上大家見到雲尼素斯同賓斯馬嘅射門準繩度再提升。二來,古圖可以同時訓練收放能力,更掌握到對龍門框同自己嘅空間感,安帥嘅讚賞亦會令佢信心提升。

所以如果你係安察洛堤嘅球員,你會好放心出去踢波,唔會擔心教練會話你;而訪問時,佢對球員嘅信任,以及佢連後備球員都讚賞可以改變戰局嘅人。有邊個聽到唔會自信心提升?

後備殺手洛迪高

另一個例子係,皇馬對曼城嘅次回合,後備上陣嘅巴西小將洛迪高兩球建功,令皇馬可以進入加時。洛迪高賽後訪問:「當Carlo(安察洛堤) 換入我,我認為可以再次改變歷史,幫我嘅球隊。但對手(曼城)入咗1球,我會話我哋將會出局。然後,喺89分鐘,我第一球帶起咗隊波!」

「好少人相信奇蹟?係,呢個係真。睇落好似無可能,我都以為我哋要出局,但第一球之後我開始慢慢相信(奇蹟),但我都無太多時間去相信,因為我已經入咗第二球。」

留意洛迪高用「我可以再次改變歷史」,佢相信自己,然後真係再次做到。洛迪高表示佢好開心,但佢未滿足於此,佢話球隊已經專注訓練而且將目標放到第14冠身上。

講起第14冠,有人問,皇馬會唔會太有自信,一早印好晒衫慶祝,又寫好晒 A por la 14 (let's go for the 14th)。

澄清番先,其實由 A por la decima (let's go for the 10th),皇馬就已經用呢個形式做口號,你可以話係自信,亦可以視為令所有皇迷都一齊擁有呢份共同信念嘅方法。讓球迷都擁有皇者之心。

5月29號凌晨3點,歐聯決賽。

雖然外間都指皇馬係underdog,唔及衝激4冠嘅利物浦,但我知道皇馬一定會踢場好波! A por la 14! Hala Madrid!

相關文章:

https://sports.now.com/home/news/details?id=36133178367

撰文:June

旅皇迷一名。喜歡旅行,喜歡足球;享受在場邊搖旗吶喊,經歷足球的喜怒哀樂。

歡迎瀏覽球十三fb專頁若得到波友一個like就是我們團隊的一大鼓舞:

www.facebook.com/ballthirteen

圖片來源 : ©AFP

  1. 更多
  1. 習近平將出席香港回歸周年大會暨第六屆政府就職典禮
    習近平將出席香港回歸周年大會暨第六屆政府就職典禮
    19分鐘前
  2. 梁愛詩:新政府應先處理民生問題 毋須急於推動政改
    梁愛詩:新政府應先處理民生問題 毋須急於推動政改
    16分鐘前
  3. 烏克蘭守軍會從北頓涅茨克撤離
    烏克蘭守軍會從北頓涅茨克撤離
    36分鐘前
  4. 上海錄得零個案 北京增兩宗確診
    上海錄得零個案 北京增兩宗確診
    42分鐘前
  5. 習近平將出席香港回歸25周年大會暨政府就職典禮
    習近平將出席香港回歸25周年大會暨政府就職典禮
    46分鐘前
  6. 挪威奧斯陸發生槍擊案 至少兩死十傷
    挪威奧斯陸發生槍擊案 至少兩死十傷
    44分鐘前
  7. 醫管局研究引入大灣區醫生 林哲玄:助拓非本地醫生來源 林志釉:不會馬上紓緩醫護人手壓力
    醫管局研究引入大灣區醫生 林哲玄:助拓非本地醫生來源 林志釉:不會馬上紓緩醫護人手壓力
    46分鐘前
  8. 香港故宮港產策展人冀帶本地元素進展覽
    香港故宮港產策展人冀帶本地元素進展覽
    1小時前
  9. 研究指猴痘病毒株與之前相比出現多個變異
    研究指猴痘病毒株與之前相比出現多個變異
    2小時前
  10. 美國眾議院通過加強槍械管制法案
    美國眾議院通過加強槍械管制法案
    2小時前