沙拿態勇。
(©AFP)
【Now Sports】英超第7輪重頭戲繼續安排於周日晚上，利物浦在晏菲路主場鬥曼城，兩隊經過周中歐聯分組賽後回到聯賽惡鬥，勝負關鍵當然要睇攻擊力。
撰文：沙維斯達
曼城周中歐聯作客巴黎聖日耳門，結果以0:2敗走，更被美斯攻入新東家第一球，面對MMN輸波，無話可說，但重回英超戰線出戰利物浦，相信開季至今狀態極佳的沙拿（Mohamed Sala），將會比美斯更難應付。
沙拿在英超6場比賽攻入5球，只對般尼一仗食白果，在FPL各項數據差不多全部第1，加上歐聯都有士哥，這個比賽狀態之穩定，今輪會令到藍月防線相當頭痛。事實上，紅軍今季新攻擊鐵三角由迪奧高祖達頂替費明奴，效果理想，祖達本身的入球能力不讓費明奴專美，只要沙迪奧文尼腳風再順，火力不比PSG組合MMN弱。
藍月除開鑼日不敵熱刺外，近5場英超不敗，上周更作客贏車路士，但入球帶點幸運成份，如果以他們的控球踢法，面對紅軍反擊應該會危機四伏，幸而過去3次交手未輸過，領隊哥迪奧拿總會找對的應付方法。
周六頭場曼聯迎戰愛華頓，開賽時間又在晚上食飯時間，對魔迷來說又是最爽睇波timing；之不過繼周中歐聯後，會否再次心臟過度負荷，看來基斯坦奴朗拿度及連皇要早點上力喔。
撰文：沙維斯達
【睇通英超】，於每輪英超比賽前後與大家分享筆者的分析與總結。