意大利根本控制大局。
(©AFP)
【Now Sports】迪布尼冇十足狀態，又冇夏神（夏沙特），意大利喺咁嘅情況下打敗比利時，係咪勝之不武？咪玩，贏就係贏。
「你隊波死好命！」「如果夏神出得，迪布尼唔係帶傷點到你哋贏？勝之不武。」「恭喜4強出局。」對比利時都未完場，就已收到啲嚟自損友嘅口訊……依家咩事先，講得出咩勝之不武，肯定唔識波。傷患從來係球賽一部份，再講，意大利今場踢得唔好咩？根本控制大局，癡筋。
夏沙特加盟皇家馬德里後已經踢唔返最高水準，從來唔將佢放在眼內，係迪布尼帶傷踢唔到100%係真，但留意比利時顯然疲態畢露，自己谷唔起，與人無尤。最興奮係睇見愛隊今時唔同往日，以前領先肯定龜縮，呢隊波下半場未去到後段依然進取搵機會，至於去到最後時刻死守，合理吖，就算係巴西阿根廷法國全部都會死守埋佢啦。
女人，最怕男人龜縮，呢班意大利球員冇龜縮，文仙尼好嘢。
坦白講，一早諗好意大利出局點round up個賽事，最初目標係8強，喺我眼中家陣超標。4強鬥西班牙，傳統上意大利食住西班牙──狂牛黃金一代例外。家陣隊西班牙一定冇沙維、恩尼斯達在陣嗰隊咁勁，所以晉級信心都大。最衰係傷咗今屆踢得好出色嘅史邊拿索拿，但我信文仙尼，佢自然有計。
撰文：Malena（燕飛）
現在我老了，人家才說「你很好」。
